Të pasurit, 1 për qind e popullsisë në botë, kanë tani gjysmën e pasurisë së planetit, sipas një raporti të ri që nxjerr në pah nivelet e pabarazisë globale. Studimi zbulon se si supër të pasurit kanë përfituar nga pasojat e krizës financiare globale të vitit 2008, duke parë përqindjen e tyre nga 42.5% që ishte në mes të krizës në 50.1 për qind që është tani. Sipas raportit të “Credit Suisse”, ai 1 për qindëshi i të pasurve në botë tani kanë një pasuri me vlerë 106 trilionë dollarë, rreth tetë herë më shumë se shuma e ekonomisë amerikane.
Gjithashtu raporti thotë se 10% e njerëzve më të pasur kanë 87.8 për qind të pasurisë globale. “Tendenca në rënie u kthye pas vitit 2008, por pjesa e 1 për qindëshit të të pasurve ka qenë drejt rritjes që atëherë”, vijon raporti. Ndërkohë Mbretëria e Bashkuar ka numrin e tretë më të madh të milionerëve, 6% në total.
“Rritja e pabarazisë mund të rrisë shpejtësinë me të cilën krijohen milionerët e rinj”, thuhet në raport. Në ekstremin tjetër, gjysma më e varfër e popullsisë botërore, 3.5 miliardë njerëz, zotërojnë vetëm 2.7 për qind të pasurisë globale. Kjo shifër u rrit më shpejt gjatë vitit të kaluar, në krahasim me 2010-n.
Për këtë arsye kanë reaguar edhe shoqata të ndryshme botërore, të cilat shprehen se duhet vepruar në mënyrë të shpejtë nga ana e liderëve politikë si në Britani ashtu edhe ndërkombëtarë. Kreu i Oxfam (konfederata ndërkombëtare e organizatave bamirëse), Kety Chakrabortty është shprehur se në “Mbretërinë e Bashkuar, 1% i të pasurve kanë parë rritjen e tyre në gati një të katërtën e të gjithë pasurisë së vendit, ndërsa gjysma më e varfër kanë më pak se 5 për qind”.
Shumë shtete europine po rriten me shpejtësi: Gjermania, Franca, Italia dhe Spanja përbëjnë një të pestën e rritjes globale gjatë vitit të kaluar. Gjithashtu në studim thuhet se gjenerata e re përballet me një disavantazh në krahasim me të vjetrit.
Duke prezantuar raportin, kryetari i bordit drejtues të “Credit Suisse” URS Rohner thotë: “Ata me pasuri më të ulët kanë tendencë që të gjenden në mesin e grupmoshave më të reja, të cilët kanë pasur pak mundësi për të grumbulluar pasuri. Por ne shohim se ata përballen me rrethana sfiduese duke i krahasuar me gjeneratat e tjera”.
Sipas Rohner-it, papunësia e lartë, rregullat e forta të hipotekave, rritja e çmimeve të banesave rritja e pabarazisë në të ardhura, qasja më e ulët ndaj pensioneve dhe lëvizja e ulët e të ardhurave kanë bërë goditjen për punëtorët dhe kursimtarët e rinj. /Tirana Today/
