Flamurtari nuk arrin të gjejë fitoren edhe përballë Kamzës në shtëpi, por lajmi i mirë është që ndalon serinë e humbjeve duke barazuar 2-2. Ishin miqtë që kaluan të parët në avantazh me anë të një 11-metërshi të kontestuar fort nga lojtarët e Duros, por të ekzekutuar saktë nga Stevan Raçiç. Vendasit zgjohen në pjesën e dytë, në të 73’ minutë, ku Sidibe tundi rrjetën e mbrojtur nga Gjonikaj.
Vuajtjet vazhdojnë sërish, pasi Ditmar Bicaj ndëshkohet me karton të kuq, për një faull si lojtar i fundit, në vijën e 16-metërshit, duke penalizuar vlonjatët. Goditjen e dënimit e merr përsipër Plaku dhe topi përplaset në mur, por në vijimin e aksionit, është sërish sulmuesi i Kamzës, ai që dërgon topin në rrjetë dhe i jep avantazhin skuadrës së Ndreut.
Flamurtari hidhet i tëri në sulm duke ditur që nuk kishte më çfarë të humbte dhe në minutën e 82’, fitojnë një 11-metërsh, pas një faulli në zonë të Zguros, ndaj Camarasë. Penalltinë e ekzekuton Juffo, që e dërgon topin në rrjetë, duke barazuar edhe njëherë shifrat. Në minutat në vijim, vlonjatët u hodhën në sulm, në kërkim të golit të fitores, por nuk ia dolën të dërgojnë sërish topin në rrjetë.
Teuta tregon autoritet në sfidën përballë liderëve të Skënderbeut dhe i ikën nga duart tre pikët në sekondat e fundit. Hila kaloi në avantazh vendasit në fillim të pjesës së dytë, pas ekzekutimit të saktë të një 11-metërshi, ndërsa Skënderbeu barazoi në minutën e 92-të, falë golit të shënuar nga James. Në minutën e fundit shtesë, Moçka shkoi sërish në zonë për të shënuar, por goditja e tij këtë herë, nuk përfundoi në rrjetë.
Pas javës së 25-të të Superiores, Skënderbeu thellon akoma distancën nga Kukësi ndjekës, ndërsa Laçi i afrohet edhe më shumë vendit të dytë dhe Luftëtari ngjitet në vendin e 4-t. Sa i përket zonës së mbijetesës, distance mes Vllaznisë dhe Teutës vijon të mbetet 4 pikë, pasi të dyja skuadrat morën nga një pikë në takimet respektive sot.
