Një oficer i ushtrisë greko-qipriote, i dyshuar për vrasjen e 7 grave në Qipro ka rrëfyer vrasjet seriale me anë të një letre, pasi donte të shkonte në burg.
Sipas mediave greke, vrasësi vendosi të rrëfente për vdekjen e pesë grave emigrante dhe dy vajzave të vogla, kur kuptoi se provat kundër tij ishin të pakundërshtueshme.
Autoritetet vendase thanë se i dyshuari, i cili ndodhet në paraburgim, ka pranuar krimet.
“Jam i mërzitur. Dua të shkoj në burg. Sillni disa letra, që të mund të rrëfej gjithçka”, tha vrasësi, i identifikuar si 35-vjeçari Nikos Metaxas.
Kapiteni i Gardës Kombëtare përdorte pseudonim Orestis për tu njohur me gratë në një aplikacion takimesh.
Ndërkaq, deri më tani janë gjetur katër trupa, ndërsa po kërkohet për trupat e grave të tjera në liqenin e Nicosia, ku Metaxas pretendon se ka hedhur tre nga viktimat e tij.
