Ja vendimet që do të mbajë qeveria “Rama 2” pas betimit në Presidencë

Pas miratimit në Parlament të kabinetit qeveritar, ministrat pritet të bëjnë betimin para Presidentit të Republikës, Ilir Meta.
Kreu i Shtetit ka mbërritur në selinë e Presidencës, ndërsa ceremonia pritet të zhvillohet në orën 17:00.
Në mbledhjen e parë të qeverisë janë 10 pika në rendin e ditës. Po kështu mësohet se vendimi i parë i qeverisë do të jetë shpallja e vitit të Skënderbeut.
Po kështu në mbledhjen e ekzekutivit pritet të ngrihet komisioni i posaçëm për figurën e Skënderbeut. Vendimi tjetër ka të bëjë me certifikatat, që do të sjellë lehtësim të burokracive administrative.
Gjithashtu burime bëjnë të ditur se pritet një tjetër vendim për godinën e Lidhjes së Shkrimtarëve.
Një vendim tjetër që pritet sot nga Këshillimi i Ministrave ka të bëjë me një fond ndihme ndaj SHBA për të prekurit nga uragani ‘Irma’.
Gjithashtu, do të miratohet procedura e përzgjedhjes së kandidatëve të komisionit të prokurimit publik, do të miratohen rregullat për përfitimin e shërbimeve publike elektronike, si dhe dhënia e dy godinave për ngritjen e organeve të reja të Vettingut.