Në mitologjinë greke, Mnemozina ishte personifikimi i kujtesës. Në Greqinë e Lashtë, para se të shkruheshin historitë, ato ri-tregoheshin me gojë. Për këtë arsye, kujtesa luante një rol të rëndësishëm në jetën e një tregimtari të Greqisë së Lashtë.
Prandaj, nuk është shumë e habitshme pse koncepti i kujtesës. paraqitet në formën e perëndeshës Mnemozina. Përveç kësaj, grekët shpikën mënyra të ndryshme për të përmirësuar kujtimet e tyre. Një nga këto ishte Metoda e Locit, e cila është përdorur
për një kohë të gjatë në botën perëndimore.
Kjo teknikë është e njohur si Udhëtimi i Kujtesës, Pallati i Kujtesës apo Teknika e Pallatit të Mendjes. Sipas oratorit romak Ciceronit, kjo teknikë u zbulua nga një poet lirik grek, Simonidi nga Ceos. Ciceroni rrëfen një histori, në të cilën sofisti u ftua për të recituar një poemë lirike në një banket në Thesali.
Menjëherë pasi recitoi poezinë, Simonidit u thirr nga dikush jashtë, ndërsa kulmi i sallës së banketit u shemb papritmas. Të ftuarit e tjerë u shtypën për vdekje, ndërsa shumica e trupave u shpërfytyruan aq shumë, sa që ishte tejet i vështirë identifikimi për të kryer më pas varrosjen e tyre.
Duke përdorur kujtesën e tij vizuale, ku ishin ulur të ftuarit në banket, Simonidi ishte në gjendje të identifikonte viktimat. Nga kjo përvojë, ai e kuptoi se do të ishte e mundur të kujtohej çdo gjë, duke e shoqëruar atë me një imazh mendor të vendit, duke zhvilluar në këtë mënyrë Metodën e Loci-t.
Pra kjo metodë, mbështetet tek vizualizimi mendor i gjërave që synohen të kujtohen. Këto objekte janë të vendosura në një mënyrë të veçantë, në vende të ndryshme, përgjatë një rrugë të njohur p.sh shtëpia, vendi i punës, etj.
Zhvillohet një udhëtim mendor me një pikë nisjeje dhe përfundimi. Prandaj, kur ju dëshironi të mbani mend për shembull një listë gjërat për të psonisur, apo pikat kryesore të një fjalimi, mjafton ta kryeni shpejt këtë udhëtim mendor, në mënyrë që të kujtoni çdo element.
Kjo teknikë e memorizimit, mund të forcohet më tej duke i bërë imazhet më të gjalla. Për shembull, imazhet mendore, mund të shoqërohen me aromën dhe tingujt mendorë. Metoda e teknikës së mësimit përmendësh Loci, ishte tejet popullore në botën e lashtë dhe është përdorur gjerësisht deri në mesin e shekullit XVII-të.
Ajo u zëvendësua përfundimisht nga sistemet fonetike. Megjithatë, studimet e kohëve të fundit, kanë dëshmuar se teknika e “pallatit të kujtesës”, mund të jetë shumë efektive. Sikurse raportoi pak kohë më parë e përditshmja britanike “The Guardian”:
Pasi kaluan 6 javë në ndërtimin e “pallatit të kujtesës”, njerëzit më shumë se e dyfishuan numrin e fjalëve që mund të mbanin mend në një periudhë të shkurtër kohore, dhe performanca e tyre mbeti e njëjtë edhe 4 muaj më vonë… pas vetëm 40 ditëve trajnim, aktiviteti i trurit të njerëzve ndryshoi ndjeshëm, duke qenë të krahasueshëm me disa nga njerëzit që janë rekordmenë botërore sa i përket kujtesës së fortë”.
