Ditën e shtunë do të inaugurohet transformimi i sheshit “Skënderbej”, i cili do t’i japë një pamje të re qendrës së kryeqytetit. Por, po të kthehemi pas në kohë, konkretisht në vitin 1931, qasja ndaj ndërtimit të sheshit ka qenë mjaft moderne dhe pjesë integrale e Tiranës. Sheshi “Skënderbej”, i cili u projektua nga arkitekti italian Florestano De Fausto parashikonte ndërtimin e 10 godinave qeveritare në qendër të kryeqytetit. Por arritën të ndërtoheshin 7 godina (6 të ministrive dhe bashkia).
Këtë na e sjell në vëmendje, studiuesi i arkivave, Kastriot Dervishi, i cili në rrjetin e tij social, Facebook, ka publikuar një foto të vitit 1931 sesi ishte konceptuar ndërtimi i sheshit. Por, me ardhjen e komunistëve në pushtet i gjithë ky zhvillim pozitiv, i konceptuar nga italianët mbeti i pa realizuar plotësisht.
“Sheshi “Skënderbej” u projektua nga arkitekti italian Florestano De Fausto. Projekti i tij parashikonte ndërtimin e 10 godinave qeveritare në qendër të kryeqytetit. Arritën të ndërtoheshin 7 godina (6 të ministrive dhe bashkia). Pa llogaritur godinën e bankës, ngelën pa u ndërtuar godinat që do ishin seli të Drejtorisë së Përgjithshme të Postë-Telegrafëve, Komandës së Mbrojtjes Kombëtare dhe Parlamentit. Kompleksi i ministrive përfundoi në vitin 1931, lulishtja dhe rrethi i sheshit përfunduan në vitin 1936. Për fatin e keq të Tiranës dhe mbarë Shqipërisë, ky zhvillim pozitiv u ndërpre nga regjimi komunist.
Projekti i sheshit “Skënderbej”, ndër të tjera, është botuar nga “Gazeta Shqipëtare” e datës 12 shkurt 1931, shoqëruar me një shkrim të Nikola Lorusso-Atomës. Gjashtë godinat, të cilat sipas Atomës përfaqësonin “një shfaqje artistike të këndshme” ishin ndërtuar nga shoqëria “Staçioli“”, shkruan Dervishi.
