Bashkia e Tiranës po përjeton një ndryshim të rrënjësishëm në strukturat e saj, me ndikimin e drejtpërdrejtë të kryeministrit Edi Rama, i cili duket se po forcon kontrollin mbi institucionin dhe po mbyll dyert për figurat kyçe të besuara nga kryebashkiaku Erion Veliaj. Largimet dhe emërimet e reja në nivelet drejtuese po sinjalizojnë një spastrim të dukshëm të kuadrove të lidhura me Veliajn, duke i hapur rrugë një administrate të re, me besnikëri të plotë ndaj qeverisë qendrore.
Si fillim, pas arrestimit të Veliajt, në krye të Bashkisë së Tiranës, me pëlqimin e Ramës, u vendos Anuela Ristani. Një nga vendimet e fundit të Ramës është gjithashtu kërkesa për shkarkim e Sekretarit të Përgjithshëm të Bashkisë, Alban Dokushi, dhe kryetares së komanduar nga Veliaj, Sara Goxhaj, të dy besnikë të Erion Veliajt. Pas këtyre shkarkimeve, Rama thuhet se ka emëruar në vend të Dokushit një të besuar të tij, duke e konsoliduar pushtetin në bashki dhe duke dhënë sinjale të qarta për spastrim të strukturave të vjetra. Me arrestimin e Veliajt, Rama po e trajton Bashkinë e Tiranës si një trofe të fituar dhe nisi menjëherë ndryshimet, duke siguruar që asnjë figurë e afërt me Veliajn të mos kishte ndikim.
Burime nga brenda Bashkisë së Tiranës tregojnë se presioni mbi drejtorët dhe zyrtarët e afërt me Veliajn është rritur ndjeshëm. Para pak javësh drejtori i policisë bashkiake dha dorëheqjen. Me zgjedhjet e ardhshme lokale dhe parlamentare në horizont, kryeministri duket se nuk po lë hapësirë për manovra të pavarura brenda Partisë Socialiste dhe po konsolidon pushtetin duke rikonfiguruar strukturat e administratës vendore. Në vijim, priten zhvillime të tjera, me largime të mëtejshme nga Bashkia e Tiranës dhe afrimin e figurave të reja, që do të jenë tërësisht të varura nga Rama.
Kjo lëvizje jo vetëm që do të ndryshojë balancën e pushtetit në institucion, por mund të ndikojë edhe në raportet e brendshme të Partisë Socialiste në prag të betejave elektorale. Për momentin, ajo që duket e sigurt është se kontrolli i Bashkisë së Tiranës ka kaluar tërësisht në duart e Edi Ramës. Kjo lëvizje politike e kryeministrit është gjithashtu një mënyrë për t’u distancuar plotësisht nga ndikimi i mëparshëm i Veliajt dhe për të krijuar një administratë të re, që do të ketë gjithmonë në fokus kontrollin e plotë të qytetit dhe të fondeve të tij.
Kontrolli i Ramës në Bashki
Rama ka treguar kohët e fundit publikisht se ai do të ketë vëmendje maksimale ndaj punëve të bashkisë. “Që Shqipëria e nesërme të jetë e drejtë dhe e barabartë me të gjithë. Siç është Tirana europiane për të gjithë, duhet të shtrëngojmë dhëmbët dhe të luftojmë. Këto dhimbje janë të padrejta, por nuk duhet të lëkundemi, përndryshe asgjë nuk ndryshon, ose ndryshon për keq, degradon, kalbet, siç u kalb Tirana. Kur në vitin 2000, unë hyra në Bashki dhe kishte vetëm 78 llamba neoni që ndizeshin nëpër Tiranë.
Përfytyrojeni ju më të rinjtë dhe ata që jetojnë sot ku e ku me atë që jetonin dje. 78 llamba neoni fiks, asnjë më shumë. Nga ndërprerjet e pafundme të energjisë elektrike, Tirana dukej natën si një varrezë-qytet. Që ta mbyll këtë parantezë, nuk më takon mua që Lali Eri është i pafajshëm ose fajtor. Pavarësish se çfarë mendojmë ne këtu, barra ime është që të qëndroj në opinionin tim dhe t’ia lë drejtësisë ta zgjidhë këtë. Barra juaj është që makineria e Bashkisë së Tiranës mos të fiket në asnjë minutë. Vëmendja ime për Tiranën, për bashkinë do të jetë e pandërprerë”, tha Edi Rama. Pas arrestimit të Erion Veliajt, kreu i socialistëve pranoi se gjatë kësaj periudhe, ai do të bashkërendojë punët në bashki me nënkryetarët.
