PSG shkatërroi Monacon një natë më parë me rezultatin e thellë 7-1, duke hipotekuar titullin kampion matematikisht. Ylli i parisienëve, Neymar ka ndihmuar shumë në këtë objektiv madhor, por një natë më parë nuk ka festuar me shokët në Paris pasi është duke rikuperuar një dëmtim në këmbë.
Por, pyetja që ngrenë të gjithë, tifozë të Parisit apo sportdashës, është gjithçka tjetër pa lidhje me futbollin. Ku ishte dje në mbrëmje Neymar, teksa skuadra e tij festonte rikthimin te titulli kampion në Ligue 1?
Përgjigjja ka ardhur prej vet talentit brazilian, përmes një “stories” në llogarinë e tij personale në “Instagram”. Në foton e publikuar aty, në plan të parë shihet një kompjuter ku shihet qartë se ai po luante poker. Për këdo që nuk e di, braziliani “O Ney” është i apasionuar marrëzisht pas pokerit, e njëkohësisht edhe imazhi i “Poker Stars”.
Por, veç kompjuterit shihej gjithashtu në sfond edhe ndeshja që po luhej në “Parc des Princes”, në një ekran televizori. Menjëherë pas përfundimit të ndeshjes, ish-futbollisti i Santosit dhe Barcelonës, gjithnjë përmes rrjetit social, raportoi edhe “gëzimin” e tij për titullin në Ligue 1. “Do të doja të isha aty me ju, komplimente!”, do të shkruante ai. A është ky një sinjal “lamtumire” në prag të merkatos verore?
Disa foto të publikuara nga braziliani në rrjetet sociale nuk u kanë pëlqyer tifozëve parizienë, sepse mendonin se edhe Neymar do ta shprehte lumturinë për këtë sukses, ku ai ka një pjesë të mirë të kontributit.
Neymar ka nxjerrë në plan të parë fotot në krah të pertneres së tij, Bruna Marquezinhe, gjatë një eventi për mbledhjen e fondeve për luftën kundër Sidës, duke anashkaluar suksesin e Parisit. “Pas një muaji do të jem në fushë”, – u shpreh Neymar, i cili u dhuroi puthje pasionante të fejuarës së tij.
