1. Angli-Zanzibar: Lufta më e shkurtër në histori, vetëm 40 minuta
E zhvilluar mes Britanisë së Madhe dhe Zanzibarit në 27 gusht 1896, konflikti zgjati gjithsej rreth 40 minuta, duke e bërë atë luftën më të shkurtër në histori. Shkaku i kësaj lufte ishte vdekja e sulltanit pro-britanik Hamad bin Thuvaini, dhe zëvendësimi i tij me Sulltan Khalid bin Barghash. Autoritetet britanike preferonin si sulltan Hamud bin Muhammed.
Në përputhje me një traktat të nënshkruar në vitin 1886, një kusht për pranimin e një sulltani, ishte që kandidati të merrte lejen e konsullit britanik, dhe Kalid nuk e kishte përmbushur këtë kërkesë. Britanikët e konsideruan këtë akt një ‘casus belli’, dhe i dërguan ultimatum sulltanit të ri, me kërkesën që ai të urdhëronte rojet të zbrisnin poshtë dhe largoheshin nga pallati. Në kundërpërgjigje, Kalid thirri rojet në pallat, dhe përgatiti mbrojtjen e fortesës.
Ultimatumi skadoi në orën 09:00 të mëngjesit të 27 gushtit, ndërsa gjatë kësaj kohe britanikët kishin mbledhur tre kryqëzorë, dy luftanije, 150 marinsa dhe detarë, dhe 900 zanzibaras në zonën e portit. Një bombardim nisi mbi pallat në orën 09:02. Flamuri në pallat u rrëzua dhe zjarri pushoi në orën 09:40. Forcat e sulltanit pësuan afërsisht 500 të vrarë dhe plagosur, ndërsa nga britanikët u plagos vetëm një marinar.
2. Lufta e Derrit: E shkaktuar nga vrasja e një derri
Lufta e Derrit, ishte një konfrontim i ndodhur në vitin 1859, ndërmjet autoriteteve amerikane dhe atyre britanike në kufirin mes dy vendeve në veriun e kontinentit amerikan. Zona specifike e mosmarrëveshjes ishin ishujt San Huan, të cilat gjenden mes Ishujve Vankuver dhe pjesës kontinentale të Amerikës së Veriut. Lufta mori këtë emër pasi u shkaktua nga vrasja e një derri. Në fakt, kafsha ishte e vetmja “viktimë” e luftës, duke e bërë në thelb konfliktin jo të përgjakshëm.
3. Lufta 335-vjeçare pa asnjë viktimë
Konflikti 335-vjeçar (1651-1986), ka qenë një luftë mes Holandës dhe Ishullit të Shillit (i vendosur në brigjet jugperëndimore të Britanisë së Madhe). Thuhet se për shkak të mungesës së një traktati paqe konflikti zgjati plot 335 vjet, duke mos pasur asnjë të shtënë të vetme. Pavarësisht dyshimeve mbi vlefshmërisë e shpalljes së luftës, paqja u shpall më në fund në vitin 1986.
4. Lufta Moldavi-Transdistria: Oficerët e të dyja palëve pinin bashkë natën, dhe luftonin njëri-tjetrin ditën
Pas rënies së Bashkimit Sovjetik, dy të tretat e Moldavisë kërkuan lidhje më të ngushta me Rumaninë dhe fqinjët në perëndim. Por zona e vendit në lindje të lumit Dniestër, kërkoi të qëndrojë më pranë Ukrainës dhe Rusisë. Lufta shpërtheu dhe lindja u shkëput për të formuar Transdistrian, një shtet që mbetet edhe sot i panjohur nga bota.
Kur Moldavia dhe Transdistria filluan luftën mes tyre, ai qe një konflikt i çuditshëm. Ushtria lokale e quajti atë Lufta e të Dehurve, pasi oficerët e luftëtarëve takoheshin çdo natë për të rrëkëllyer nga një gotë bashkë. Më pas në mëngjes zinin pozicionet në front dhe hapnin zjarr mbi njëri-tjetrin. Mbrëmjeve ata takoheshin sërish bashkë, për të pirë për kujtimin e atyre që kishin takuar një natë më parë dhe që i kishin vrarë në betejë.
5. Lufta e Emu-ve: Ja si Australia humbi luftën ndaj shpendëve
Lufta Emu, e njohur edhe si Lufta e Madhe Emu, qe një operacion ushtarak një javor që ndërmori Australia në nëntor të vitit 1932 për t’i dhënë zgjidhje shqetësimin publik mbi numrin e zogjve Emu, që gjendeshin në distriktin Kampion të Australisë Perëndimore. Emu- po reagonin ndaj një vere të gjatë dhe të nxehtë, e cila shkaktoi mungesa të rënda në ushqime dhe ujë.
“Lufta” u zhvillua nën komandën e majorit Meredit të Artilerisë Mbretërore Australiane, që komandoi një forcë ushtarësh të armatosur me dy mitraloza Ljuis dhe 10.000 fishekë.
Por të qëllosh verbërisht mbi një tufë shpendësh, që mund të vrapojnë deri në 50 km/h nuk mund të sjellë rezultatet e pritura. Zogjtë thjesht u larguan, edhe pasi u goditën me disa breshëri mitralozi.
Gjatë një jave apo më shumë, vetëm një pjesë e vogël e 20.000 zogjsh Emu u arritën të vriteshin. Major Meredit u habit, dhe i krahasoi këta zogj me Zulutë. Pas disa ditësh Ministri i Mbrojtjes urdhëroi tërheqjen. Dhe kështu “Lufta Emu”, përfundoi me një humbje ushtarake për Australinë.
6. Lufta e vitit 1812: E shkaktuar nga komunikimet e gabuara telegrafike
E quajtur ndryshe Lufta e Zotit Medison, Lufta e 1812-ës, qe në shumë aspekte lufta më çuditshme në historinë e Shteteve të Bashkuara të Amerikës. Ajo mund te quhej edhe Lufta e Komunikimit të Gabuar. Dy ditë para shpalljes së luftës, qeveria britanike deklaroi se do të shfuqizonte ligjet që qenë arsyeja kryesore për të luftuar.
Nëse do të kishte pasur komunikim telegrafik me Evropën, lufta edhe mund të ishte shmangur. Ankesa kryesore e SHBA-ve kundër britanikëve ishte ndërhyrja me transportin e anijeve.
Por Nju Inglënd, seksioni i madh i anijeve të Shteteve të Bashkuara, kundërshtoi ashpër idenë për të shkuar në luftë. Kërkesa për luftë erdhi kryesisht nga perëndimi dhe jugu.
Është e çuditshme gjithashtu që lufta, e zhvilluar për lirinë e deteve nisi me pushtimin e Kanadasë.
Përveç kësaj, traktati i paqes që i dha fund luftës, nuk qartësoi asnjë nga çështjet mbi të cilat ajo supozohej se ishte zhvilluar. Së fundmi, të dyja palët shpallën fitoren në Luftën e 1812-ës, dhe u bë qartë se e gjithë lufta ishte një masë kontradiktash konfuze.
Përshtati për Tirana Today, Alket Goce
