Në prag të sfidës së fundit të fazës së parë që Partizani do të zhvillojë me Kamzën, tekniku italian Mark Iuliano është shprehur optimist për një rezultat pozitiv. Po ashtu ai i ka mëshuar faktit se përballë Flamurtarit ne zhvilluam një ndeshje mjaft të mirë dhe nuk e merituam humbjen. Ne nuk i shfrytëzuam si duhet rastet tona ndërsa ata në rastin që patën na ndëshkuan dhe pastaj ishin të humbur në fushë. Po ashtu Iuliano mendon se në ndeshjen e nesërme do të jetë momenti ideal për tu rikthyer sërish tek fitoret. Flamurtari e goditi Partizanin në një moment mjaft të mirë pasi ata vinin nga tre fitore rresht.
“Lojtarët janë të vetëdijshëm se ishte një humbje e rëndë, por duhet të marrim të gjithë përgjegjësitë dhe duhet të rikthehemi te rezultatet pozitive. Jemi në një moment ku duhet të tregojmë se mund të arrijmë rezultate të mira. Nuk jam i shqetësuar, edhe pse më vjen keq për lojtarët dhe tifozët dhe e di se duhet të punojmë më shumë. Nuk me trembin kritikat, përgjigjet pres t’i japim në fushën e lojës”.
Partizani pati një start mjaft të dobët dhe ekipi është në përmirësim e sipër, për këtë arsye të gjithë janë në vëzhgim nga drejtuesit. Tekniku italian shprehet se problemi i tyre i vetëm është finalizimi i aksioneve dhe se sulmi është pika më e dobët e jona.
“Çdo javë jemi në vëzhgim dhe fjalët e Moggit janë normale. Duhet të përmirësohemi në finalizim, ku kemi edhe pikën tonë me të dobët. E dimë që duhet të bëjmë më mirë, edhe pse ndonjëherë është e vështirë, sepse krijon shumë dhe nuk arrin të fitosh”.
Sa i përket objektivit që ka ekipi këtë sezon, Moggi ka shmangur titullin kampion dhe ka lakmuar vetëm Europën. Sa i përket kësaj çështje numri një i pankinës së të kuqve nuk ka preferuar ta komentojë, por është shprehur se ajo që duhet të bëjmë është vetëm të punojmë, që të përmirësohemi.
“Jam dhe nuk jam dakord me Moggin për çështjen e titullit. Puna ime është të rikthej rezultatet dhe lojën e bukur. Kryesore për mua është ta çoj skuadrën në një nivel të lartë. Mua më takon vetëm të punoj dhe jo të flas”,-përfundoi Iuliano.
Partizani është në vendin e pestë me 11 pikë dhe do të ketë përballje direkte me Kamzën e vendit të katërt që ka një pikë më shumë. Kamza ka qenë surpriza e këtij sezoni deri tani dhe pritet të jetë një ndeshje mjaft delikate për Partizanin.
