Një spital amerikan ka refuzuar një pacient për një transplant zemre, pasi ai nuk ishte i vaksinuar kundër Covid-19. DJ Ferguson, 31 vjeç, ka nevojë të madhe për një zemër të re, por Brigham and Women’s Hospital në Boston e hoqi atë nga lista e tyre, tha babai i tij, David. Ai tha se vaksina kundër Covid bie ndesh me “parimet bazë të djalit të tij, ai nuk beson në të”. Spitali tha se po ndiqte politikën e tij.
Brigham and Women’s Hospital i tha BBC-së në një deklaratë: “Duke pasur parasysh mungesën e organeve në dispozicion, ne bëjmë gjithçka që mundemi për të siguruar që një pacient që merr një organ të transplantuar, të ketë shanset më të mëdha për të mbijetuar”.
Një zëdhënës tha se spitali kërkon “vaksinën Covid-19 dhe sjelljet e stilit të jetesës për kandidatët për transplantim për të krijuar shansin më të mirë për një operacion të suksesshëm, dhe për të optimizuar mbijetesën e pacientit pas transplantimit, duke pasur parasysh se sistemi i tyre imunitar është i shtypur në mënyrë drastike”.
Spitali shtoi se shumica e 100.000 njerëzve në listat e pritjes për transplantim organesh, nuk do të marrin një organ brenda pesë viteve, për shkak të mungesës së organeve në dispozicion.
DJ Ferguson ka qenë në spital që nga fundjava e fundit e Falenderimeve, 26 nëntor 2021, dhe ai vuan nga një problem i trashëguar i zemrës që bën që mushkëritë e tij të mbushen me gjak dhe lëngje.
Organizatori i mbledhjes së fondeve tha se Ferguson ishte i shqetësuar se ai mund të përjetonte inflamacion kardiak – një efekt anësor i mundshëm nga vaksinimi kundër koronavirusit. CDC inkurajon marrësit e transplantit dhe ata në rrethet e tyre të afërta që të vaksinohen plotësisht.
Dr Arthur Caplan, kreu i etikës mjekësore në Shkollën e Mjekësisë NYU Grossman, tha për CBS News se pas çdo transplantimi të organeve, sistemi imunitar i një pacienti mbyllet plotësisht dhe madje edhe një ftohje e zakonshme mund të jetë fatale.
Burimi i lajmit: BBC. Përshtatur nga Tirana Today
