Gjyqtari Shkëlqim Miri ka dalë sot para Gjykatës për t’u njohur me masën e sigurisë. Ai u arrestua dy ditë më parë, teksa iu gjetën në shtëpi më shumë se 300 milionë lekë, ndërsa akuzohet për “Korrupsion aktiv të gjyqtarit, prokurorit dhe funksionarëve të tjerë të drejtësisë”, “Korrupsionit pasiv të gjyqtarëve, prokurorëve dhe funksionarëve të tjerë të organeve të drejtësisë”.
Prokuroria ka kërkuar masën e sigurisë “arrest me burg” për Mirin, i cili ishte nën hetim nga Prokuroria e Krimeve të Rënda prej të paktën 6 muajsh.
Gjyqtari i Apelit akuzohet se ka marrë një shumë parash për të lënë në fuqi vendimin e dënimit që favorizonte një të dënuar për vrasje, konkretisht Gentian Dodën, të cilit i ishte ndryshuar akuza nga vrasje në plagosje të rëndë me dashje.
Dy persona kanë kryer rolin e sekserëve për paratë që dyshohet se ka marrë Miri në këmbim të votës pro lënies në fuqi të një vendimi të Gjykatës së Matit, që i kualifikonte veprën të akuzuarit Gentian Doda, nga “vrasje me paramendim” në “plagosje të rëndë me dashje”, me pasojë vdekjen.
Sekserët janë identifikuar si shtetasit Alban Buçi dhe Kujtim Miri. Ky i fundit është djali i xhaxhait të Shkëlqim Mirit, ndërsa Alban Buçi është njeri i afërt me të akuzuarin Gentian Doda.
Ata kanë ndërmjetësuar dhe kanë qenë pjesë e takimeve ku është konsumuar vepra penale e “korrupsionit”. Hetimet për Shkëlqim Mirin kanë nisur në janar të këtij viti, pas informacioneve se gjykatat shqiptare po kryenin manovra për t’i dhënë liri të akuzuarit për dy vrasje, Gentian Dodës.
Buçi dhe Miri dyshohet se janë takuar në maj disa herë për të negociuar lidhur me pagesën që do të kryhej te gjyqtari.
Buçi ka dorëzuar paratë te Kujtim Miri, i afërmi i gjyqtarit dhe më pas ka njoftuar Gentian Dodën për kryerjen e transaksionit.
Sipas hetimeve, takimet janë bërë në Fushë-Krujë dhe dyshohet se pagesa ka qenë 20 mijë euro, në këmbim të votës pro lënies në fuqi të vendimit të Gjykatës së Matit.
Konkretisht, gjyqtarit i janë sekuestruar 174 mijë e 810 euro, 1 milion e 149 mijë lekë dhe 1 mijë dollarë.
