Italia ka pezulluar Traktatin Shengen prej mesnatës së 10 majit e deri në mesnatën e 30 majit, pra për një periudhë 20 ditore.
Shkak i këtij pezullimi është garantimi i sigurisë në zhvillimin e punimeve të Samitit të vendeve G7. Ky samit do të zhvillohet më 11-13 maj në qytetin e Barit dhe në Taormina më 26-27 maj.
Urdhri për pezullimin e Traktatit Shengen është dekretuar nga Ministria e Brendshme më 06 prill 2017, si dhe është vendosur që gjatë këtyre ditëve të rivendoset kontrolli i policisë në kufijtë e brendshëm, tokësor, detar e ajror.
Masa është marrë edhe për garantimin e sigurisë kombëtare e ndërkombëtare gjatë qëndrimit të liderëve më të rëndësishëm të tokës në Itali për samitin e G7.
Enti Kombëtar i Aviacionit Civil Italian ka informuar të gjithë aeroportet italiane e shoqëritë ajrore për rivendosjen e kontrollit të policisë së kufirit, duke ftuar udhëtarët të mbërrijnë në aeroporte para orarit të parashikuar e me dokumentet e domosdoshme për të kaluar kufirin kombëtar.
