Jo vetëm Tirana, por edhe Roma ka ndaluar fishekzjarret për Vitin e Ri. Është kryetarja e Bashkisë së Romës, Virginia Raggi, e cila ka firmosur urdhëresën e ndalimit të hedhjes së fishekzjarreve, kapsollave, materialeve shpërthyese e lojërave piroteknike, në të gjithë territorin e qytetit të Romës.
Kryebashkiakja ka motivuar këtë vendim, me shpjegimin se “është detyrë e Bashkisë të garantoj sigurinë, e të mbroje jetën e qytetarëve sidomos gjatë eventeve festive të organizuara në natën e fundvitit”.
“Siç dëshmon dhe eksperienca e viteve të shkuara, thuhet në këtë urdhëresë, shpërthimi i fishekzjarreve e lojërat piroteknike kanë shkaktuar aksidente, sidomos në vendet e tejmbushur me njerëz e në prani të minorenëve, duke shtuar dhe efektet negative që këto shpërthime shkaktojnë tek kafshët”.
“Uroj, -shkruan kryetarja e Bashkisë së Romës, – që të gjithë banorët e të gjithë turistët që kanë vendosur të kalojnë natën e fundvitit në Romë, të festojmë ardhjen e Vitit të Ri në një mbrëmje të qetë e argëtuese”.
