Italia do të zhvillojë finalen e parakohshme përballë Suedisë për të siguruar një vend në fazën e grupeve të botërorit “Rusi 2018”. Nuk ka vend për gabime në ndeshjen e sotme për axurrët të cilët duhet ta fitojnë me çdo kusht këtë ndeshje nëse duan të jenë pjesë e këtij evenimenti. Ndeshja e parë e zhvilluar në Suedi u mbyll me rezultatin e ngushtë 1-0 në favor të vendasve, ku ai devijim nga De Rossi pas gjuajtjes së Johansson e dërgoi topin në rrjetë rezultoi deçiziv për ndeshjen. Momenti më i mirë për italianët ishte me mbrojtësin anësorë Darmian, i cili godet portën por topi përfundon në shtyllën e portës së mbrojtur nga Robin Olsen.
Një situatë e tillë nuk përjetohej prej dy dekadash, që nga koha e përballjes në play off me Rusinë, kur “axurrët” siguruan pjesëmarrjen në “France 1998” falë rezultatit të përgjithshëm 2-1. Ka kaluar vërtet shumë kohë, megjithatë Gianluigi Buffon e kujton shumë mirë ndeshjen e parë, pasi pikërisht në Moskë portieri legjendar italian bëri debutimin, teksa zëvendësoi Gianluca Pagliuca-n e dëmtuar. Por këtë herë misioni duket më i vështirë pasi Suedia mbrohet shumë mirë dhe nuk lë shumë hapësira mbrapa, ndërsa Italia nuk ka sulmin më të mirë për të shpresuar tek shënimi i shumë golave. Një 1-0 do ta çonte ndeshjen në shtesa, ku do të ishte m0omenti më i mirë për italianët dhe në rast se goditeshin 11-metërshat. Por axurrët nuk duhet të pësojnë gol dhe duhet të jenë mjaft të qetë dhe të sigurt në prapavijë, në rast pësimi atëherë kualifikimi do të vështirësohej akoma më shumë.
Italia është kualifikuar për në fazën finale të Kupës së Botës plot 18 herë, ndërsa Suedia në krahun tjetër numëron 11 pjesëmarrje, megjithëse “verdheblutë” munguan në dy edicionet e fundit, ku u eliminuan në të dy rastet nga Portugalia e Cristiano Ronaldos, fillimisht në fazën e grupeve dhe më pas në play off. Italia kryeson bilancin e përgjithshëm me 11 fitore dhe 7 humbje në 24 ndeshjet e zhvilluara ndërmjet tyre, megjithatë në sfidat kompetitive statistikat janë krejtësisht në ekuilibër, me dy ekipet që kanë fituar nga 5 takime në 12 duelet mes tyre. Në përballjen më të fundit përpara play off-it, në Toulouse, në Europianin e fundit, “të kaltrit” patën nevojë për një gol në 88′ nga Eder për të eliminuar Suedinë, gjithsesi tani çdo gjë është e qartë dhe Italia minimalisht duhet të mbërthehet te një rezultat i tillë, por, mbi të gjitha duhet të mos pësojë, përndryshe në përfaqësuesen “axurre” do të dëgjojmë shumë shpejt për revolucion dhe largim masiv të gardës së vjetër.
Ndesha do të zhvillohet sonte në orën 20:45 në një “Giuseppe Meazza” të flaktë. I cili do të jetë i tejmbushur nga tifozët e kaltër, të cilëve u është bërë thirrje nga lojtarët që ti mbështesin sa më fortë në një moment kaq të vështirë dhe të rëndësishëm që ka ekipi para. /TIRANA TODAY/
