Pak ditë më parë, kryeministri Rama hodhi poshtë në mënyrë kategorike të gjitha zërat që po qarkullojnë këto ditë nga opozita dhe disa media, që Shqipëria do të strehojë ish luftëtarët e kapur rob të ISIS-it, në një kamp të financuar nga vendet e BE. Madje ai i mëshoi faktit se kjo histori tregon se në çfarë katandie është opozita e këtij vendi.
Pas zhurmës së madhe mediatike, krijuar me një hov të madh edhe nga ana e PD-së e LSI-së, është ambasadorja e BE-së, Romana Vlahutin, e cila i jep vulën përfundimtare.
Ajo është vënë në krah të Ramës, duke cituar se nuk do të ketë kamp. Nga Berati, ajo ka mbyllur debatin e hapur ditët e fundit, ku pretendohet se në Shqipëri mund të ngrihet një një qendër rehabilitimi për ish-luftëtarët e ISIS. Sipas saj, është biseduar mbi mundësinë e ngritjes së një qendre studimore, por jo kampi refugjatësh.
“Jo, është tërësisht një keqinterpretim i asaj që ka thënë në atë konferencë për shtyp kryeministri bullgar. Unë kam qenë aty e pranishme, dhe mund t’ua siguroj që është absolutisht një “Jo”.
Pra, ideja është që ajo për të cilën është folur prej një kohe të gjatë, është të pasurit e një qendre, e cila është një qendër studimore, ku kolegët mund të diskutojnë, të shohin fenomenin se çfarë po ndodh.
Absolutisht nuk ka asnjë lloj ideje për të pasur një kamp të tillë”, tha Vlahutin.
Në Shqipëri, opozita ka akuzuar qeverinë se ka pranuar ofertën e BE-së për ndërtimin e një kampi për të larguarit e luftëtarëve të ISIS. Por ndryshe nga dy palët, Rama e ka sqaruar se nuk ekziston asnjë lloj ideje, apo kërkese, për të krijuar një kamp për ish luftëtarët e ISIS në Shqipëri.
