Miliarderi i njohur dhe themeluesi i Microsoft, Bill Gates është divorcuar nga bashkëshortja e tij, Melinda disa ditë më parë.
Edhe pse ata e bënë publike këtë fakt, nuk pati ndonjë arsye konkrete se përse i dhanë fund martesës së tyre 27-vjeçare.
Ndërkohë, shokët e golfit të Bill Gates ishin ndër të parët që mësuan se martesa e tij ishte në vështirësi. Miliarderi i Microsoft-it e përshkroi marrëdhënien e tij me gruan Melinda si “pa dashuri”, shumë përpara se divorci i çiftit të bëhej publik, shkruan The New York Post.
“Billi foli me miqtë e tij të ngushtë në kursin e golfit. Ai u tha atyre pak kohë që martesa ishte pa dashuri, se kishte mbaruar për disa kohë dhe ata po jetonin jetë të ndara”, tha një burim.
Gates është një fanatik i golfit, i cili u martua me gruan e tij në klubin e golfit Manele Bay Hotel në Hawaii në vitin 1994.
Ndër të tjera, është mësuar se vendimi për divorc ishte i vështirë për Melindën për shkak të besimit të saj të fortë katolik.
“Ajo dëshiron të marrë një anulim nga Vatikani pas divorcit civil”, tha një burim që ka punuar me Melinda. Ajo ishte shumë e mërzitur me burrin e saj të pasur për shkak të lidhjeve të tij me biznesmenin e ndjerë i akuzuar për pedofili, Jeffrey Epstein.
Bill dhe Melinda u njohën në vitin 1980 dhe ajo u bë pjesë e Microsoft. Ata kanë tre fëmijë dhe drejtojnë së bashku Fondacionin Bill & Melinda Gates.
