Specialistët e Institutit të Shëndetit Publik flasin për nivele alarmante të përhapjes së sëmundjes së depresionit në popullatën shqiptare.
ISHP ka kryer dy studime, nëpërmjet të cilave ka matur përhapjen e kësaj sëmundjeje, gjatë viteve të fundit në Tiranë, ndërsa shifrat rezultojnë alarmante. Bëhet fjalë për një studim me ndjekje, në vitet 2012-2016, të një kampion të moshuarish, si dhe një studim transversal te një kampioni të rinjsh të shkollave të mesme, kryer tre vite më parë.
Janë disa faktorë që ndikojnë në zhvillimin e depresionit tek të moshuarit dhe tek të rinjtë, si:
Mosvajtja tek mjeku për shkak të turpit dhe paragjykimit nga shoqëria
Marrja e gabuar e qetësuesve anksiolitikë nëpër farmaci (pa asnjë lloj rekomandimi)
Kështu, kërkohet që të mos neglizhohet marrja e kujdesit të duhur në kohë, tek një mjek specialist, si dhe farmacive u është kërkuar që të mos lëshojnë qetësues pa recete, duke qenë se përdoruesit e tyre kanë krijuar varësi, shkruan Dita.
Vlerësohet se rreth 1 në 4 persona vuajnë nga depresioni të paktën një herë në jetën e tyre. Për fat të keq, ky problem nuk trajtohet si sëmundjet e tjera, për shkak të turpit dhe paragjykimeve të njerëzve që kanë këto simptoma. Kjo lidhet edhe me të shkuarën e vendit tonë, pasi depresioni në vendet komuniste është konsideruar gabimisht si shenjë e dobësisë së karakterit, thonë ekspertët e shëndetit publik.
Kur duhet të vlerësohet rreziku për depresion:
Nëse keni 5 ose më shumë prej simptomave të mëposhtme, që janë të pranishme gjatë të njëjtës periudhë 2-javore, dhe paraqesin ndryshim nga javët e kaluara, duhet të konsultoheni menjëherë me mjekun specialist, për të shmangur në kohë çdo problematikë të shëndetit mendor:
1 – Në pjesën më të madhe të kohës keni humor depresiv, kjo ndodh pothuajse çdo ditë.
2- Pakësim të dukshëm të interesit/kënaqësisë, pothuajse në të gjitha veprimtaritë, shumicën e ditës, afërsisht çdo ditë.
3 – Humbje (rënie) e dukshme në peshë pa mbajtur dietë, ose shtim në peshë.
4 – Pagjumësi, ose gjumë i shtuar, pothuajse çdo ditë.
5 – Axhitim psikomotor ose prapambetje pothuajse çdo ditë.
6 – Lodhje, ose humbje energjie, pothuajse çdo ditë.
7 – Ndjenjë e pavlerësisë ose e fajit të tepruar.
8 – Pakësim i aftësisë për të menduar apo për t’u përqendruar, ose pavendosmëri, pothuajse çdo ditë.
9 – Mendime të vazhdueshme të vdekjes (jo vetëm frikë nga vdekja), ide suicidale të vazhdueshme, pa ndonjë plan specifik, ose përpjekje e planifikuar për suicid.
