Joni Peçi, edhe më herët ka treguar për fëmijërinë e tij të vështirë, dhe se nuk ka qënë aspak e lehtë për të për tu bërë dikush në jetë. Në programin “E diela shqiptare”, ai i është rikthyer së kaluarës, duke u rrëfyer për jetën personale dhe sidomos fëmijërinë që s`ka qenë aq e bukur. Familja e tij u internua kur ai ishte vetëm 4 vjeç.
“I tillë ishte sistemi. Gjyshi ishte oficer. Familja ime ka qenë kundër sistemit. Ne na internuan. Është një moment shumë i vështirë.
Unë kam qenë shumë i vogël, dhe më kujtohet që shkoja çdo mëngjes në kopsht. Më çonte gjyshi. Atë ditë ai ishte larguar për të na blerë simite, dhe mami më nxori prej dore deri tek rrugica, që më pas të takoja gjyshin.
Dhe … në një moment shikoj një makinë që ishte një Jeep i asaj kohe, dhe shikoj dy policë që vijnë e marrin. Marrin mamin tim, por unë s`e kuptoja. Isha diku tek 4 a 5 vjeç.
Erdhi gjyshi dhe e kuptoi situatën që ndodhi, por gjithsesi më çoi në kopsht. Më kujtohet se si prisja në dritare tek kopshti, të vinte të më merrte mami. Kur u ktheva nga kopshti, një kamion po merrte plaçkat e shtëpisë sonë”, tregoi ai, duke e ndërprerë disa herë rrëfimin nga zëri që i dridhej.
