Ish-presidenti Rexhep Meidani nuk e përjashton një bashkëqeverisje mes Partisë Socialiste dhe Partisë Demokratike pas zgjedhjeve të 25 qershorit
Sipas, Meidanit koha e tabuve ka përfunduar, por e rëndësishme për Shqipërinë dhe shqiptarët, është cilësia e qeverisjes dhe ndershmëria e saj, sidomos pas deformimeve jo të vogla gjatë viteve të fundit në shumë plane.
“E thënë shkurt, pas zgjedhjeve, për mendimin tim, çdo lloj kombinimi në qeverisje është i mundshëm, përfshirë dhe atë PS-PD; por ajo varet shumë edhe nga shpërndarja e votave apo “orekset” politike të drejtuesve kryesorë”,-tha ai.
Po ashtu, sipas Meidanit funksionimi i “koalicionit të madh” lidhet me “filozofinë” e qeverisjes, me mirëkuptimin e ndërsjellë në ndërtimin e programit të saj.
Gjithashtu, ish- presidenti në një intervistë për gazetën “Panorama”, u shpreh se koalicioni mund të funksionojë në mënyrë të veçantë me kapacitetet individuale e konkrete qeverisëse, me kontrollin dhe balancimin e tyre nëpërmjet Parlamentit, grupeve e komisioneve parlamentare, pse jo dhe deri në një llogaridhënie të rregullt partiake.
