Ish-presidenti i Dinamos së Zagrebit në Kroaci, Zdravko Mamic i cili konsiderohej si figura më e rëndësishme e futbollit në vend është dënuar me 6 vite e gjysmë heqje lirie. Mamic u dënua sepse ka përfituar me miliona euro nga tarifat e transferimit të futbollistëve kur ai ishte drejtues te klubi i Dinamo Zagrebit.
Sipas vendimit të lexuar nga kreu i Këshillit Gjyqësor, Darko Kruslin, Mamiç është shpallur fajtor për të gjitha akuzat e ngritura mbi të. Milan Pernar dhe Zoran Mamiç u shpallën të pafajshëm për një nga akuzat, por rezultuan fajtorë për rolin e uljes së detyrimeve fiskale të Mamiçit, apo për marrje e dhënie ryshfeti.
Zdravko Mamic nuk ishte vetëm shefi ekzekutiv i një prej klubeve më të suksesshme të Kroacisë, por ai gjithashtu mbante detyrën e zëvendës presidentit në federatën kroate të futbollit. Për vite me radhë, tifozët kanë akuzuar atë dhe bashkëpunëtorët e tij se e shfrytëzonin klubin për tu pasuruar, nëpërmjet transferimeve të futbollistëve të skuadrës.
Në 2015, ai dhe i vëllai, Zoran, trajneri i Dinamos u arrestuan (Vëllai i tij u dënua me 4 vite e 11 muaj). Skandali mori përmasa ndërkombëtare, kur fansat kroatë hodhën flakadanë në fushë gjatë kampionatit evropian në Francë në 2016. Mamic madje u plagos me armë, kur po shkonte në varreza, te varri i të atit. Asnjë prej të pandehurve nuk ishin të pranishëm në gjykatë kur u dha vendimi. Por, ajo që bën çudi është se Zdravko Mamiç njoftoi ditën e djeshme, një ditë para marrjes së vendimit, se ndodhej në Medjugorje të Bosnje-Hercegovinës, edhe pse deklaroi se nuk po iu shmangej autoriteteve.
