Edita Tahiri, ish-kryenegociatore në dialogun me Serbinë, ka deklaruar se nëse presidenti i Kosovës, Hashim Thaçi, pajtohet që me Serbinë dialogu të mbyllet me këmbim territoresh, do t’i bënte favor Sllobodan Millosheviqit, Aleksandar Vuçiçit e Vladimir Putinit. Për rrjedhojë, po sipas saj, nëse Serbia do të merrte veriun, do të plotësohej dëshira për krijimin e Serbisë së Madhe, dhe të destabilizimit të Ballkanit.
“Mirë është bë që nuk është hap kjo ide në dialog. Po të hapej debati i tillë, në politikë quhet hapje dere. Kosova lindi si shtet pas 100 vitesh. 100 vjet kemi luftuar. Ne s’u bashkuam me Shqipërinë që ishte e drejtë e jonë e natyrshme. Pavarësia ishte kompromisi që zgjodhëm. Tani kur Kosova është realitet, Gjykata Ndërkombëtare për Drejtësi e njohi si të ligjshme. Mbi 100 vende na kanë njohur. Çdo cenim i territorit është për t’i dhënë fitore Milloshevicit.
Vënia në pikëpyetje e kësaj arritje është dështim gjeopolitik dhe hapje e rrugës për të kthyer ndikimin rus në Ballkan. Serbia e Madhe bëhet duke marrë veriun e Kosovës, sepse ka tashmë Bosnjën.
Përsëri do të kthehej hegjemonia serbe dhe destabilizim i ri. Rusinë nuk e duam, e lëre më të hapim dyer për të bërë Serbinë e madhe e të rehatojmë nacionalistët serbo-rusë.
Çdo këmbim territori, i bën favor Milloshevicit, Putinit e dëmton interesat e shqiptarëve”, ka thënë Tahiri.
