Kryeministri australian Anthony Albanese thotë se do të hetojë raportet se paraardhësi i tij, Scott Morrison, ka marrë fshehurazi tre role në ministri. Morrison u bë ministër i përbashkët për portofolet e shëndetësisë, financave dhe burimeve në dy vitet para se të humbiste pushtetin në maj, raportojnë mediat lokale.
Albanese tha se do të kërkonte këshilla ligjore për vendimet, duke i quajtur ato “të papranueshme” dhe “thjesht të çuditshme”. Ish-kryeministri nuk ka pranuar të komentojë.
Të hënën, Guvernatori i Përgjithshëm David Hurley – përfaqësuesi i Mbretëreshës në Australi – konfirmoi se ai kishte nënshkruar një “instrument administrativ” që i kishte lejuar zotit Morrison të merrte fshehurazi portofolet. Ishte “në përputhje me nenin 64 të kushtetutës”, tha një zëdhënës.
Por zoti Albanese, ekspertë të ligjit dhe ish-kolegët e z. Morrison kanë kritikuar sekretin që e rrethon atë. Madje disa ministra thuhet se nuk ishin në dijeni se po ndanin portofol me ish-kryeministrin. Mediat lokale raportuan se ish-ministri i Shëndetësisë Greg Hunt, ra dakord në vitin 2020 të ndante portofolin e tij në rast se ai bëhej i paaftë nga Covid.
Por ministri i atëhershëm i financave Mathias Cormann – tani kreu i OECD – mësoi vetëm javën e kaluar se roli i tij ishte mbajtur bashkërisht, tha një raport nga gazeta lokale News.com.au.
Morrison u betua si ministër i dytë i burimeve – duke u bashkuar me Keith Pitt – vitin e kaluar. Morrison përdori fuqitë e tij për të bllokuar një licencë për kërkimin e gazit në Uellsin e Ri Jugor – një vendim i kundërshtuar nga zoti Pitt. Albanese tha se nuk do të spekulonte mbi këshillat e ardhshme ligjore, por akuzoi paraardhësin e tij se kishte qeverisur “në hije”.
Kur u pyet për t’iu përgjigjur komenteve të z. Albanese, z. Morrison tha se nuk ishte në dijeni të tyre. “Që kur u largova nga puna, nuk jam angazhuar në asnjë politikë të përditshme”, tha ai për Sky News Australia.
Zëvendësi i Morrison nga qershori 2021, Barnaby Joyce, tha se ai nuk kishte njohuri paraprake për emërimet.
“Kam marrë vesh për këtë dhe nuk jam dakord me të. Unë besoj në një sistem kabineti qeverisjeje ku ministrat janë përgjegjës për portofolin e tyre. Ne nuk kemi një formë presidenciale të qeverisjes”, tha zoti Joyce për Channel 7.
Burimi i lajmit: BBC. Përshtatur nga Tirana Today
