Kryetari i partisë Fryma e Re Demokratike, Bamir Topi, u shpreh se ai e ka mbështetur gjithmonë idenë e zgjedhjes së Presidentit nga populli, por sipas tij propozimi i Bashës është bërë në një moment kur nuk ka kohë, pasi kanë filluar procedurat për zgjedhjen e tij.
“Është shumë vonë për këtë ide, duhet të bëhej më herët. Jam një nga artikuluesit e parë që jam shprehur se Presidenti të zgjidhet nga populli. Basha e bën propozimin sot ndërkohë që ka një proces të zgjedhjes së presidentit, duhet një periudhë për të ndryshuar Kushtetutën për fushatën, pra atëherë kjo vlen për 5-vjeçarin e ardhshëm, por unë do të isha në çdo kohë për President nga populli”, tha ish presidenti Topi.
Deklarata e ish-presidentit Topi erdhi pasi në parlament janë konsumuar dy raundet e para për zgjedhjen e Presidentit të Republikës së Shqipërisë.
