Partizani ka prezantuar ditën e sotme përpara medieve një kampion bote si brazliani Bebeto. Ai mbërriti ditën e djeshme në Shqipëri ku u takua me presidentin e Partizanit, Gaz Demi.
Tek Partizani, Bebeto do të jetë përfaqesuesi i 15 herë kampioneve të vendit për Amerikën Latine. Roli i Bebetos do të jetë i ngjashëm me atë që ka Luaçiano Moxhi në Europë.
“Përveç futbollit Bebeto është një nga politikanët e rëndësishëm në Brazil. Midis nesh ka një miqësi dhe kemi një bashkëpunim pune që mendoj se do të jetë shumë serioz, qoftë për ekipin e parë apo edhe për akademinë.
Është një eksperiencë e re, pasi në të kaluarën nuk kemi pasur lidhje me Amerikën Latine. Shpresoj që nëpërmjet miqësisë tonë të bëhet një bashkëpunim serioz në të ardhmen. Që tani zotëria na ka sjellë një lojtar që për pak kohë do e shikoni në fushë.
Për disa arsye teknike nuk do jetë ndoshta në ditët e para. Mendoj që është një talent. Do jetë diçka serioze, jo si menaxherët e tjerë që flasin shumë dhe bëjnë pak”, tha Gaz Demi
Ndërsa, Bebeto u shpreh se ai do të jetë këshilltari i presidentit Demi dhe synimi do të jetë ndërtimi i një akademie moderne.
“Tashmë jam një lojtar i ri i Partizanit. Akademia e klubit do të jetë një investim i rendesishem për të ardhmen. Unë do të jem në rolin e këshilltarit të Klubit.
Si lojtar hyra në fushë për të fituar dhe të njëjtën gjë do të bëj edhe tani dhe premtoj, pasion, dedikim dhe shumë punë.
Kam sjell një lojtar, Uarli, është një talent por aktualisht nuk është në formë të mirë. Me kalimin e kohës do të tregoj talentin e tij”, tha Bebeto.
