Ish-basketbollisti i Kombëtares shqiptare dhe Partizanit, Agim Fagu ka marrë sot nga presidenti Meta dekoratën “Gjergj Kastriot Skënderbeu”.
Basketbollisti i njohur i viteve ’70-të shkëlqeu jo vetëm në fushën e basketbollit, por edhe në arenën e diplomacisë shqiptare.
“Ka dekorata që nderojnë njerëz, por ka edhe njerëz që nderojnë dekorata. Agim Fagu është pikërisht i tillë. Mund të flisja gjatë për personalitetin e Agim Fagut si diplomat, por fare shkurt mund të them se personaliteti i tij ka shkëlqyer në mënyrë të veçantë në detyrën si ambasador i Britanisë, ku kontributi i tij për zgjidhjen e luftës së Kosovës ka qenë i jashtëzakonshëm. E kam të vështirë të flas për Agim Fagun, për arsye se unë nuk kisha lindur në 1968, kur ai shkëlqente si basketbollist”, tha ndër të tjera presidenti Meta.
Por, kush është Agim Fagu?
Diplomati lindi në Tiranë në një familje sportistësh dhe nisi karrierën sportive në moshën 16-vjeçare.
Përgjatë 14 viteve luajti vetëm me “Partizanin”, dhe fitoi me të 9 kampionate kombëtare, 7 Kupa të Shqipërisë, merr pjesë në 8 Kupa të Europës, merr dhjetëra çmime ndërkombëtare e kombëtare midis të cilave: Mjeshtër Sporti në 67, Mjeshtër i Merituar Sporti në 69, shënuesi më i mirë në Turneun Olimpik në Holandë 1972, në Kampionatin Europian në Gjermani 1974 shënuesi më i mirë etj.
Në vitin ’78, idhulli i mijëra njerëzve shkëputet nga sporti.
Iu fut politikës politikës pas viteve ‘89, kur u shpall edhe kandidat për kreun e bashkisë së kryeqytetit.
Në vitin 1998 legjenda e basketbollit shqiptar emërohet ambasador i Shqipërisë në Mbretërinë e Bashkuar në Londër. Ai qëndroi në këtë post për gati 7 vjet, nga viti 1998 deri në vitin 2005 dhe gjatë kësaj periudhe luajti një rol të madh në përmirësimin e marrëdhënieve midis dy vendeve si dhe lehtësimin e procedurave të vizave.
Agim Fagu u largua nga posti i ambasadorit të Shqipërisë në Angli në vitin 2005.
Agim Fagu në 2011 ka marrë edhe medaljen “Për shërbime të Shquara” me motivacionin “Për arritje të jashtëzakonshme në sportin e basketbollit, si një ndër sportistët shqiptarë më të mirë të të gjitha kohërave. Për kontributin e veçantë të dhënë në klubin sportiv “Partizani” dhe për kombëtaren shqiptare të basketbollit, si dhe për rritjen e reputacionit të basketbollit shqiptarë, si brenda dhe jashtë kufijve të Shqipërisë”.
