Gëzim Krasniqi është një nga lojtarët që u bë “kokë turku” tek Partizani në këtë merkato dimërore, bashkë me Malotën dhe Vilën. Edhe pse vetë klubi nuk ka nxjerrë akoma asnjë njoftim, fakti që nuk udhëtuan drejt Turqisë me pjesën tjetër të grupit lë të kuptosh se ata nuk janë më pjesë e projektit.
Vetë Krasniqi ka konfirmuar largimin nga “të kuqtë” me anë të një statusi në Facebook, duke mos e fshehur zhgënjimin ndaj trajnerit dhe drejtorit të ri teknik.
“Nga tani ju bëj me dije që nuk jam më pjese e klubit Partizani … Falënderoj të gjithë ata që më përkrahën këto sezone këtu, falënderoj tifozët për mbështetjen ,falënderoj Sulejman Starovën për largimin tim nga Partizani që arsyet i din vetëm ai, falënderoj drejtorin Olsi Rama për sinqeritetin që tregoi ndaj meje. Shpresoj që gabimi dhe e keqja e klubit të kemi qenë ne. I uroj suksese klubit dhe skuadrës në pjesën e mbetur të kampionatit”.
