Kryediplomati Iranian, Mohammad Javad Zarif propozoi sot në Norvegji krijimin e një mekanizmi rajonal të përhershëm në zonën e Gjirit Persik, me qëllim zgjidhjen e konflikteve si ai që po përplas Katarin me aleatët e tij.
“Është jashtëzakonisht e rëndësishme për rajonin tonë jo vetëm për të zgjidhur këtë konflikt apo përplasje të përkohshme mes fqinjëve tanë jugorë të Gjirit nëpërmjet dialogut, por për të ndërtuar një mekanizëm të përhershëm konsultimi, bisedimesh dhe zgjidhjesh konfliktesh në rajon”, vlerësoi Zarif.
Gjatë një konference për shtyp me rastin e takimit të përvitshëm të ndërmjetësve dhe aktorëve në procese paqeje, Zarif përmendi si shembull “Marrëveshjen e Helsinkit”, duke iu referuar marrëveshjes së nënshkruar në vitin 1975, në mes të Luftës së Ftohtë, që reduktoi tensionet mes bllokut perëndimor dhe atij komunist.
