Forcat irakiane të mbështetura nga Shtetet e Bashkuara, kanë njoftuar rreth një sulmi të gjerë për pjesët e fundit të qytetit Mosul, që ende janë nën kontroll të militantëve të Shtetit Islamik .
Komanda e përbashkët operacionale thanë se forcat e sigurisë po e sulmonin “atë që mbetet territor i paçliruar” në bregun perëndimor të lumit Tigër në këtë qytet, që është baza e fundit e rëndësishme e ISIS në Irak.
Agjencia Associated Press ka raportuar, duke u mbështetur në dy oficerë ushtarakë irakianë, se avancimi i forcave qeveritare ishte ngadalësuar nga snajperët dhe sulmuesit vetëvrasës, ndërsa përleshjet e djeshme karakterizohen si “sporadike”.
Nëse Mosuli bie nën kontrollin e forcave të qeverisë së Irakut, atëherë kjo do të paraqiste goditje masive për ekstremistët e ISIS.
Mosuli ishte qyteti ku lideri i IS-it, Abu Bakr al-Baghdadi, e ka shpallur të ashtuquajturin “kalifat” të tij para tri vitesh.
Nga ana tjetër, banorët në Qytetin e Vjetër i kanë thënë agjencisë Reuters me telefon se situata atje po bëhej tejet e rrezikshme për ta.
