Një investim prej 88 mijë dollarësh do të mundësojë vendosjen e 100 kamerave të sigurisë në qytetin e Gjilanit. Investimi do të bëhet nga ambasada amerikane në Kosovë, përmes ICITAP-it, ndërsa lajmi u bë i ditur nga vetë kryetari i Gjilanit, Lutfi Haziri në mbledhjen e bordit të drejtorëve të mbajtur të hënën.
“E falënderoj ICITAP dhe Ambasada Amerikane për mbështetjen në realizimin e këtij projekti shumë të rëndësishëm për Gjilanin. Kamerat do të vendosen në qytet, nëpër institucionet publike, në shkolla dhe në tri hyrje-daljet e qytetit dhe me këtë do të krijohet një siguri dukshëm më e madhe për qytetarët”, ka thënë Haziri.
Sipas tij, projekti do të fillojë brenda pak ditësh, ndërsa do të përfundojë brenda këtij vitit, kurse Komuna e garanton mirëmbajtjen e tyre.
Ndërkohë, në mbledhjen e sotme u konfirmua se të gjitha rrugët gjithandej territorit të komunës janë të hapura dhe kalueshme, pas reshjeve të fundit të borës, njofton Insajderi.
