Interi pret Crotonen, Spalletti: Të zhgënjyer nga premtimet e drejtuesve

Interi është duke kaluar një formë mjaft të dobët në këtë fazë të kampionatit edhe pse e nisi me një marsh shumë të lartë. Mendohej se drejtuesit e rinj kinezë dhe stafi i ri, do të bënin ndonjë lëvizje të madhe në merkaton e janarit, për të forcuar ekipin. Por në të vërtetë vetëm dy lojtarë erdhën, Lisandro Lopez dhe Rafinha, shumë më pak nga sa priteshe. Zikaltërit do të kthehen këtë javë në kampionat përballë Crotones së Zengës, për të largua krizën që i ka kapluar, ku në 7 javë morën 5 barazime dhe 2 humbje. Në këtë sfidë pritet të mungojë edhe kapiteni Icardi, për tëcilin është raportuar se ka një dëmtim.

Do të jenë rreth 50 mijë tifozët e pranishëm në stadium që më shumë sesa do të mbështesin skuadrën pritet të kontestojnë drejtuesit për lëvizjet e munguara në merkaton e dimrit. Në konferencën për shtyp përpara ndeshjes ndaj skuadrës kalabreze trajneri i Interit Luciano Spalletti preku edhe temën e merkatos duke theksuar.

“ Unë personalisht kisha folur me pronarët e klubit dhe më shpjeguan se ka disa limite. Tifozët kanë mbetur të zhgënjyer por jo nga premtimet e drejtuesve por nga ajo që dëgjohet dhe shkruhet në media. Ramires është një lojtar i kompletuar që di të përshtatet në çdo rol të mesfushës, por unë personalisht bisedova me Steven Zhang dhe më tha që ishte e pamundur që ai të transferohej tek Interi, ashtu si edhe Pastore që te PSG merr një pagë jashtë parametrave tonë”.