Interi ndalet dhe nga Atalanta në barazimin e bardhë pa gola, duke prekur një rekord negativ me tre ndeshje pa shënuar. Të fitosh në fushën e Atalantës në vitet e fundit është bërë mjaft e vështirë, madje skuadra e Gasperinit është futur në radhët e ekipeve më të forta në Itali, këtë e vërtetoi edhe sonte përballë Interit.
Spalleti çuditërisht në këtë përballje kishte vendosur të ndryshojë modulin dhe të paraqitet me një mbrojtje me tre. Atalanta e nisi më mirë ndeshjen dhe u shfaq shumë e rrezikshme para Handanovic, i cili ka qenë heroi i ndeshjes me pritjet. Gomez, Barrow dhe Freuler ishin mjaft të rrezikshëm, duke shfrytëzuar edhe ngathtësinë e mbrojtjes së Interit.
Interi po përdorte strategjinë e kundërsulmit dhe Perisic mund të kishte shënuar një gol, por edhe ai tregohet i pasaktë. Në fund të takimit Inter ishte më këmbëngulës dhe Rafina dhe Perisic humbën përsëri raste të mira. Një barazim që vendos Inter me pikë të barabarta me Roma dhe Lazio, që luajnë nesër derbin e kryeqytetit ndërsa Atalanta është në vend të tetë me shpresën për një vend në Europa League.
