Interi është duke kaluar në një formë mjaft të mirë, duke ‘shkatërruar’ Genoan në San Siro me rezultatin e thellë 5-0. Me këtë fitore të besuarit e Spallettit kanë rimarrë vendin e dytë dhe janë vetëm 3 pikë larg Juventusit i cili do të përballët me Cagliarin.
Zikaltërit e nisën mjaft mirë sfidën edhe pse me ndryshime të shumta në formacion. Në minutën e 14’ ishte Gagliardini që ka kaluar në avantazh Interin. Mesfushori i talentuar italian megjithëse kohët e fundit nuk ka luajtur shumë, ka shfrytëzuar mundësinë e tij duke pasur një impakt të menjëhershëm.
Vetëm dy minuta më pas Inter dyfishon rezultatin me Mateo Politano-n. Kjo është hera e parë që pas prillit të 1996-ës që dy italianë shënojnë dy gola për Inter në 20 minutat e para. Atëherë ishin Branca dhe Carbone.
Me golin e dytë Inter luan me qetësi dhe vetëbesim të madh duke mos lejuar miqtë të rrezikojnë thuajse asnjëherë portën e tyre. Rasti i vetëm i Genoa-s, (nëse mund të quhet rast), është gabimi trashanik i Handanovic, i cili për pak sa nuk dërgon topin në rrjetën e tij. Pas pushimit Inter vulos përfundimisht fitoren me dopietën e Gagliardini-t.
Në fund, kishte kohë edhe për Joao Mario-n të shënonte golin e parë të sezonit me një goditje të bukur në hyrje të zonës. Ai është rikthyer dhe është një armë më shumë e këtij Inter-i të frikshëm. Por zikaltrit nuk kishin të ngopur, Nainggolan i rikthyer nga dëmtimi ka shënuar golin e pestë në sekondat e fundit të takimit. Një fitore e madhe.
