Ndeshja Inter-Juventus e sezonit të shkuar vazhdon të komentohet për favorizimin që bënë arbitrat në atë sfidë për bardhezinjtë. Një karton i kuq i dhënë shumë shpejt për Vecino dhe një tjetër i munguar për Pjanic. Daniele Orsato ishte arbitër kryesor në atë sfidë, por shumë dyshime ngriti edhe përshëndetja e Paolo Taglaiventos me trajnerin e Juves, Massimiliano Allegrin.
Ish-arbitri i Serisë A, Taglaivento ka folur për radion “Kiss Kiss” dhe është kthyer te momenti i shumëdiskutuar në përfundim të ndeshjes së luajtur mes Inter-Juventus 28 prillin e kaluar, kur ai ka patur një këmbim batutash me trajneri e bardhezinjve.
“Fjalët e Allegri-t pas Inter-Juventus janë keqkuptuar. Gjithmonë ka takime me trajnerët në fund të ndeshjes, për t’u përshëndetur, ka ndodhur edhe me ata të Roma-s, Napoli-t, Inter-it dhe shumë të tjerë. Momenti me Allegri-n ka ndodhur para kamerave dhe është keqkuptuar nga të gjithë”, ka thënë Tagliavento.
“Inter-Juve është drejtuar nga një arbitër i madh dhe nuk më takon mua të them nëse Pjanic duhej ndëshkuar me kartonin e kuq. Daniele Orsato do t’i tregojë të gjithë se është një arbitër i madh. Të gjithë gabojnë, edhe lojtarët, presidentët dhe trajnerët”, ka thënë Tagliavento.
