Një muaj më parë, kryeministri Rama e cilësoi hapjen e negociatave për Shqipërinë, si jetë a vdekje. Në një intervistë për “Euronews”, kreu i qeverisë shqiptare tha se kjo gjë duhet të ndodhë në Qershor, dhe populli shqiptar nuk pret asgjë tjetër përveç kësaj. Por ndryshe nga pritshëritë e Ramës, Basha ia ka përplasur sot në fytyrë një të vërtetë të madhe, e cila na lë në baltë, sa i takon kësaj ëndrre të madhe. Kreu demokrat dëshmoi sot me fakte se Rama nuk i ka bërë detyrat e shtëpisë, e kjo përkthehet në ngelje në klasë. Vettingu, një ndër kushtet bazë kanë “kushtëzuar” negociatat, e ndërsa BE ka kërkuar kokën e “peshqve të mëdhenj”.
“Sot në këtë seancë, në mënyrë të përsëritur, prej më shumë se tetë javësh, kjo mazhorancë dhe kjo qeveri e falimentuar politikisht, moralisht, e zhytur dhe e lidhur me krimin, po mundohet të japë përshtypjet se gjithçka ecën normalisht.
Edi Rama, mbrëmë është informuar sikundër jam informuar dhe unë, për një ngjarje të hidhur dhe me pasoja të tmerrshme për fatin e negociatave, për fatin e integrimit europian të Shqipërisë. Por ai ka ardhur këtu sot të bëjë të paditurin, të fshehë të vërtetën apo të manipulojë atë përmes mediave të kapura prej gryke, me favore, joshje dhe shantazhe qeveritare.
Mbrëmë, vetëm 24 orë pas samitit franko-gjerman dhe takimi Merkel-Makron, kristian demokratët dhe kristian socialët gjermanë, aleatët, partia jonë simotër, anëtarë të partisë evropiane dhe social demokratët gjermanë, aleatët dhe partia simotër e Partisë Socialiste, e anëtarë të Partisë Socialiste Evropiane, kanë rakorduar qëndrimin e tyre sa i takon hapjes apo jo të negociatave me Shqipërinë.
Video/ Basha nuk i ndahet Ramës: Mos më bëj lojëra për negociatat, e di mirë ç’të ka thënë Merkel
Ashtu si Rama e di fare mirë, lajmi nga ky rekomandim është më i keqi që shqiptarët mund të prisnin, është një lajm që Shqipëria nuk e meriton, por është verdikti gjerman tashmë jo thjeshtë i Gunther Krichbaum vetëm, Johann Wadephul, por i mazhorancës gjermane, konservarorë dhe socialistë së bashku se Edi Rama ka gënjyer, se Rama nuk i ka bërë detyrat. Se Shqipëria nuk i ka plotësuar kushtet për hapjen e negociatave. Në këtë rezolutë e cila do të bëhet zyrtare javën e ardhshme, të martën, për herë të parë Shqipërisë nuk i vendosen thjeshtë kushte, por edhe një proces kontrolli që demostron pabesueshmërinë ndaj çdo lloj raportimi nga Edi Rama, apo hallka institucionale të blera e të korruptuara nga ai. Kjo është një ngjarje dramatike për Shqipërinë”, tha Basha sot në Kuvend.
Lufta kundër korrupsionit dhe krimit të organizuar është trumbetuar shpesh nga zyrtarë të lartë të BE –së për negociatat. Por duket se ende kemi punë për të bërë, pasi sipas Bashës, Rama nuk i ka punët mirë në këtë drejtim. Sipas tij, e vërteta është ajo çfarë di çdo shqiptarë dhe shqetësimet që kanë parashtruar partnerët evropianë.
“Shqipërisë nuk i thuhet një “Jo” e prerë, por deri sa të plotësohen kushtet. Deri sa Saimir Tahiri të jetë aty ku e kanë vendin trafikantët dhe politikanët e lidhur me drogën.
Shqipëria të mos ketë një ministër tjetër të Brendshëm i cili harxhon gjithë ditën e tij duke mbrojtur vëllain e tij trafikant të dënuar droge, dhe kokën e krimit të organizuar në Vlorë, deri sa qeveria ti kthehet njerëzve, deri sa të kemi një bashkëqeverisje me qytetarët dhe jo bashkëqeverisje me krimin dhe oligarkët.
Këto janë kushtet e një vendi që i do të mirën Shqipërisë. E një vendi të taksapaguesve ku gjermanët kanë paguar më shumë se çdo komb tjetër në këto 27 vite për zhvillimin tonë ekonomik, për shtetin ligjor”, tha më tej Basha.
Kreu i PD-së po e thotë troç: Ata lart janë peshqit e mëdhenj, ata janë të pandëshkueshmit, ndaj Vettingu ka nisur nga poshtë, për të mbrojtur veten.
TIRANA TODAY
