Instituti i Statistikave publikoi raportin “Shkaqet e vdekjeve” për vitin 2016, ku rezulton se në krahasim me 2015-ën, numri i vdekjeve ka rënë me 4,6%.
Në total numri i vdekjeve në Shqipëri në vitin 2016 është 21.388, duke rezultuar me një normë vdekshmërie prej 74,3 për 10.000 banorë, ku femrat zënë 47,2 % dhe meshkujt 52,8 %.
Në vijim sqarohet se vdekjet natyrale zënë 87,4 % të totalit në vitin 2016, pasuar nga vdekjet e shkaktuara nga aksidentet me 2,1 % dhe ato nga vetëvrasjet 1,1 %.
Koeficienti i vdekshmërisë amtare në 2016 ka rënë në 3,2 për 100.000 lindje të gjalla, nga 9,0 që ishte në 2015.
Për sa u përket sëmundjeve, sipas raportit të INSTAT, rreth 52,0 % e vdekjeve janë shkaktuar nga “sëmundjet e aparatit të qarkullimit të gjakut”, të cilat për këtë periudhë janë ulur me 4,2 %, në krahasim me 2015.
Ndër shkaqet e tjera që zënë peshë të rëndësishme në numrin e vdekjeve janë “tumoret” me 15,8 % të totalit, të cilat në vitin 2016 janë rritur me 2,1% krahasuar me 2015-ën.
Vdekjet sipas grupmoshave
Në vitin 2016, grupmosha 50 vjeç e lart zë 92,5 % të vdekjeve dhe grupmosha 85 vjeç e lart zë 25 %.
Numrin më të lartë të vdekjeve në grupmoshën 85 vjeç e lart e zënë femrat me 63,8 %. Në vitin 2016, janë regjistruar 277 vdekje nën 1 vjeç, ndërsa krahasuar me 2015, ky numër është rritur me 18,9 %.
Në 2016, për grupmoshën 70-74 vjeç ka rënie të numrit të vdekjeve me 15,7 %, krahasuar me 2015.
Vdekshmëria sipas qarqeve
Duke analizuar vdekshmërinë sipas qarqeve, norma më e lartë regjistrohet në Gjirokastër me rreth 121 vdekje për 10.000 banorë, ndërsa norma më e ulët regjistrohet në qarkun e Tiranës me rreth 60 vdekje për 10.000 banorë.
