Andres Iniesta është vënë nën shënjestrën e klubit kinez, Tianjin Quanjian, të cilët janë të gatshëm të bëjnë gjithçka vetëm për të siguruar shërbimet e spanjollit. Në ofertën që i është bërë yllit të Barcelonës ka pasur edhe një pikë mjaft të çuditshme. Kinezët ishin të gatshëm ti blinin Iniestas 2 milionë shishe vere të prodhuara nga kompania “Bodega Iniesta” e Manchuela, në pronësi të mesfushorit, i cili prej nga viti 2010 është edhe prodhues verërash.
Kështu, duke iu referuar asaj që shkruajnë në Spanjë dhe Gjermani, klubi i pasur i Super Ligës së Kinës, i drejtuar nga trajneri Paulo Sousa nuk është e gatshme vetëm të paguajë Iniestan, 35 milionë euro në vit, por madje ka premtuar që të shtojë në kontratë edhe një “klauzolë verërash”.
Tianjin Quanjian duket se është i gatshëm të bëjë gjithçka për të pasur shërbimet e 33-vjeçarit, i cili ka nënshkruar një rinovim të përjetshëm me Barcelonën. Por në futboll asnjëherë nuk i dihet, pasi në verë do të jetë Iniesta që do të vendosë për gjithçka.
Një eventualitet ky i sinjalizuar edhe nga Pep Guardiola, që me Iniestan ka ndarë shumë nga sukseset më të rëndësishme në historinë moderne të Barcelonës, dhe që di mirë se sa kontributi i tij mund të jetë ende thelbësor për Manchester City, por sikurse shkruan ironikisht edhe tabloidi “The Sun”, historia e verërave mund të përfundojë që të dehë të gjithë.
