Kryeministri indian, Narendra Modi emëroi për herë të parë sot një grua në krye të Ministrisë së Mbrojtjes, ndërkohë që tensionet vazhdojnë me Kinën dhe Pakistanin.
Nirmala Sitharaman do të udhëheqë Ministrinë e Mbrojtjes në një kohë kur India është përfshirë në një mosmarrëveshje me Kinën përsa i përket rrafshnaltës së Himalajeve dhe tensionet janë ende më të larta në Kashmir, një territor i ndarë me Pakistanin.
Sitharaman ka mbajtur postin e sekretares së Shtetit për Tregtinë. Qeveria indiane numëron tashmë gjashtë gra, mes të cilave Sushma Swaraj në krye të Ministrisë së Punëve të Jashtme.
“Komiteti i sigurisë së qeverisë, që numëron vetëm katër ministra, ka tashmë dy gra dhe këto do të vendosin në mënyrë të barabartë me burrat për çështjet e sigurisë së vendit. Ky është një mesazh i mrekullueshëm për të gjithë vendin që merr Indinë për model dhe për të gjithë ata që e vëzhgojnë Indinë duke pyetur: Çfarë po ndodh me gratë në Indi?”, tha Sitharaman për stacionin televiziv indian News18.
Indira Gandhi kryeministre në vitet 1970 dhe 1980, ka mbajtur dy herë për një kohë të shkurtër postin e ministres së Mbrojtjes. Ajo u vra në vitin 1984.
