Sekretari i Përgjithshëm i LSI, Luan Rama, në një deklaratë për media ka kërkuar shkarkimin e drejtorit të përgjithshëm të policisë, Haki Çako si dhe disa shefave të komisariateve për mosveprim apo përfshirje në dhunë ndaj simpatizantëve të LSI-së.
Luan Rama denoncoi sot dy rastet e dhunës ndaj përkrahësve të LSI, dhunimin e një koordinarori në Fushë Krujë dhe dhunimin e kryetares së LSI në Pukë.
Deklarata:
Delikuentë të Rolindjes, nën mbështetjen nga struktura të veçanta të Policisë së Shtetit dhe të inkurajuara nga mosveprimi i tyre, sot janë shfaqur me akte dhune.
Është goditur me sende të forta në mes të qytetit Fushë-Krujë, Blerim Çela, koordinator i LSI, persona të armatosur kanë vajtur kanë kërcënuar pjesën tjetër dhe e kanë qëlluar këtë në kokë. Mosveprimi në komisariatin e Fushë Krujës është skandaloz.
Ashtu sikundër edhe në Pukë, ku burra, cuba, të rilindjes kanë dhunuar dy femra, kryetaren e LSI dhe LRI. Nga informacionet që kemi në Pukë rezultojnë të përfshirë Astrik Kuçi kryetar i Bashkisë.
Kemi informuar të gjitha strukturat dhe kemi denoncuar targat e këtyre mjeteve. E gjithë kjo dhunë e gjen frymëzimin te kryetari i rilindjes që e fton policinë të mbledhë vota.
Këto raste dëshmojnë edhe një herë, sesa e inkriminuar është një pjesë e strukturave të policisë.
Kërkoj menjëherë shkarkimin e Haki Çako dhe shefit të komisariatit në Lezhë, Pukë, Fushë-Krujë dhe Berat. Mosveprimi është pjesëmarrje në krim.
