Luan Baci, kreu i PD-së në Fier, ka reaguar pas deklaratës së kreut të LSI-së në Këshillin Bashkiak të Fierit, mbi projektin për ndërtimin e impiantit të mbetjeve.
Një ditë më parë, Nimet Musaj tha se duhet transparencë për qëndrimin e bashkisë së Fierit, si dhe u shpreh se LSI-ja është kundër këtij projekti.
Pas këtyre deklaratave, ka reaguar Luan Baci, i cili akuzoi LSI-në se ka votuar pro këtij projekti, ndërsa tani kërkon të bëjë të paditurin që të fitojnë pikë ndaj banorëve.
“I keni patur dokumentet përpara, por nuk i pranonit sugjerimet tona. E hëngrët turpin me bukë, pasi e ndryshuat vendin pas protestave të banorëve. Turp për të dyja palët, që deri dje votonin për impiantin, ndërsa sot me Facebook apo me deklarata publike, kërkojnë që të bëjnë të paditurin, në mënyrë që të fitojnë pikë ndaj banorëve. Turp që po talleni me njerëzit. Nëse doni t’i ndihmoni këta banorë, mblidhni këshillin dhe anulojeni vendimin për ketë impiant”, tha Luan Baci.
Impianti i parashikuar të ndërtohet mes 4 fshatrave të Fierit, ka sjellë pakënaqësinë e banorëve, të cilët kanë protestuar kundër këtij projekti.
