Dalin detaje të reja lidhur me grabitjen spektakolare në Rinas, ku u morën disa milionë euro brenda ambienteve të aeroportit.
Një prej grabitësve të arrestuar tashmë nga policia, Oltion Veseli është personi i veshur komando që gjendet në pistën e aeroportit pranë avionit të linjës Tiranë-Vienë.
Siç duket edhe në foto, Veseli i veshur si komando kërcënon me kallashnikov, ndërsa pranë tij është Admir Muratajt gjithashtu i maskuar.
Veseli në vitet 2000 ka qenë në Jemen me studime, më pas ka shkuar në Afganistan dhe më pas është arrestuar nga amerikanët për terrorizëm, raporton BalkanWeb.
Ai u arrestua në 2005 nga trupat amerikane gjatë një operacioni kundër talebanëve në Afganistan. Veseli u riatdhesua në 25 qershor të 2006. 38-vjeçari ishte vetëshpallur imam i xhamisë në Krujë.
I arrestuari Oltion Veseli nga Fushë Kruja, është kushëri me Ernest e Dash Kupën, të dënuar nga drejtësia për grabitjen e blindave në rrugën e Rinasit në 2017. I arrestuari tjetër Alkond Bengasi, është kushëri me Klement Çalën, ndërsa dy të tjerët Saimir Çela dhe Renaldo Sula njihen si njerëzit e tij të besuar.
