Kryetari i Kuvendit, Ilir Meta, thirri në një takim të gjitha partitë parlamentare, në orën 19:00, në Kryesinë e Kuvendit. Në tryezën e thirrur nga Meta pritet që të diskutohen rekomandimet e OSBE/OHDIR për zgjedhjet, por edhe zgjidhjen e krizës politike.
Të ftuar në takim nga kryetari i Kuvendit janë: Partia Socialiste, Lëvizja Socialiste për Integrim, Partia Demokratike, Partia për Drejtësi, Integrim dhe Unitet, Partia Republikane, Partia Bashkimi për të Drejtat Njeriut.
Nuk dihet qëndrimi që do të mbajë Partia Demokratike, sepse kjo parti ka kushtëzuar pjesëmarrjen në zgjedhje me formimin e një qeverie teknike.
Kjo lëvizje e Metës, vjen fill pas takimit që ai pati sot me trojkën e ambasadorëve të akredituar në Tiranë, si edhe pas bashkëbisedimit që, po sot, zhvilloi me kryeministrin, Edi Rama.
