Dy lojtarët që startuan në sfidën me Spanjën nuk do të jenë nën urdhrat e Panuccit në ndeshjen përballë Italisë në Shkodër. Bëhet fjalë për Taulant Xhakën dhe Llullakun të cilët do të mungojnë për shkak kartonësh. Kjo ka bërë që të dy futbollistët të kthehen në ekipet e tyre që në ditën e sotme.
Por lajmi i mirë është se në përballjen e 9 tetorit, ku Shqipëria do të përpiqet të ruajë vendin e tretë dhe të fitojë ndonjë pozicion në renditjen e përgjithshme të FIFA-s do të kthehen tre lojtarë të rinj. Kthehet Mavraj, Roshi dhe Kukeli, të tre këta lojtarë ishin të pezulluar për shkak kartonësh me një ndeshje dhe tani mund të vihen sërish nën urdhrat e teknikut Italian. Kuqezinjtë kanë dështuar një natë më parë përballë Spanjës dhe kanë treguar disa dobësi. Por kjo vjen si pasojë e ndërrimit të trajnerëve dhe akoma nuk është futur mirë në psikologjinë e lojtarëve skema dhe taktikat e lojës që ka Panucci. Kombëtarja Shqiptare ka afruar në grup lojtarë të rinj në moshë të cilëve po u jepen minuta nga Panucci, që ti ketë të gatshëm për eliminatoret e Europianit 2020.
Tre rikthime mjaft të rëndësishme për Shqipërinë para sfidës së fundit të fazës së grupeve që është përballë Italisë. Një Itali që duket me shumë probleme pas atij barazimi të pabesueshëm përballë Maqedonisë. Por nuk duhet harrur që Ventura ka shumë mungesa në ekip si pasojë e dëmtimeve, ky një lajm i mirë edhe për Shqipërinë që mund të përfitojë e të marrë një rezultat pozitiv.
