Ish-drejtori i Arkivit në Ministrinë e Brendshme, historiani Kastriot Dervishi në një postim në rrjetin social “Facebook” shkruan mbi fatin e shqiptarëve të Kosovës që u larguan nga keqtrajtimi jugosllav për të ardhur në Shqipëri.
Dervishi në postimin deklaron se shqiptarët e Kosovës gjetën një gjenocid tjetër që regjimi internacionalist i Enver Hoxhës ushtroi mbi ata. Historiani thotë së Hoxha shqiptarët e Kosovë i struku nëpër ferma, kampe, e shumë prej tyre edhe i burgosi.
Shumë nga shqiptarët që kishin ardhur në Shqipëri për te gjetur lumturinë, kërkuan me dëshirën e tyre të riatdhesoheshin në Jugosllavi për t’i shpëtuar keqtrajtimeve.
Postimi i plotë i Kastriot Dervishit
Historitë e shqiptarëve të Kosovës që erdhën në Shqipëri për të shpëtuar nga keqtrajtimi jugosllav e për të gjetur lumturinë janë të shumta. Ka qenë një gjenocid tjetër që regjimi internacionalist i Enver Hoxhës ushtroi mbi këtë pjesë të kombit shqiptar, të cilën e struku nëpër ferma, kampe, e shumë prej tyre edhe i burgosi. Prej këtij keqtrajtimi, në vite të ndryshme, shumë prej tyre kërkuan të riatdhesohen.
Më poshtë paraqitet një letër drejtuar diktatorit, pjesë e një praktike voluminoze mbi keqtrajtimin dhe sjelljen kriminale ndaj shqiptarëve të Kosovës.
Letra
I nënshkruari Mark Gjolaj me kombësi shqiptare, tani emigrant, nga Jugosllavia, me qëndrim në NBSH “Çlirimi” sektori Seman në Fier, ju paraqes sa vijon:
Më datë 12.3.1953 kam emigruar në RP të Shqipërisë, me qenë se si shqiptar kam dëshiruar dhe dëshiroj të jetoj këtu.
Qysh nga dita e ardhjes sime në Shqipëri, kam qenë vetëm nëpër burgje dhe kampe duke mos qenë kurrë i lirë, megjithëse kam një të kaluar të mirë patriotike shqiptare.
Për këtë arsye ju drejtohem juve dhe ju lus që të më ndihmoni duke urdhëruar lirimin tim nga Semani.
Seman, më 15.12.1957
Me nderime
Mark Gjolaj
NBSH “Çlirimi” sektori Seman, Fier
