Shpëtim Idrizi e përshkruan ngjarjen e djeshme në Bularat si një alarm për institucionet e sigurisë kombëtare.
Kreu i PDIU-së ka nxjerrë disa detaje, ndërsa i kërkon llogari Ministrisë së Brendshme dhe SHISH për 2 persona anëtarë të bandës së Vorio Epirit, që sipas tij janë ndaluar më 25 tetor në Kakavijë e më pas janë të lirë për shkak të ndërhyrjes së konsullit grek.
“Ky është rasti për të ngritur alarmin për institucionet e sigurisë kombëtare, SHISH, prokurorinë etj sepse si është e mundur që persona të tillë që në profilet e tyre e tregojnë haptas që janë ushtarë të Vorio Epirit, nuk ndalohen.
Unë sot dua të bëj dy pyetje për ministrinë e Brendshme dhe SHISH.
A janë ndaluar më 25 tetor nga policia e shtetit në pikën e Kakavijës anëtarët e Bandës së Vorio Epirit, shtetasit grekë Mondis Kokalios dhe Theodhoros Asvestopulos përreth 4 orë, a janë ndaluar më pas këta shtetas me ndërhyrjen e konsullit grek të Gjirokastrës.
PDIU i bën thirrje ministrisë së Jashtëm të kërkojë urgjentisht nga autoritetet greke shpjegime për ngjarjen e djeshme. Veprimtarinë e organizatave terroriste të Vorio Epirit në Greqi, sic e pamë edhe dje në aktivitetin e dhunshëm përpara ambasadës shqiptare në Athinë, ku protestohej me flamur të Vorio Epirit.
Ministria jonë e Jashtme duhet të kërkojë shpjegime urgjent nga shteti grek dhe për financimet sekrete të ministrisë së Jashtme, standard që nuk ekziston në diplomacitë perëndimore. PDIU do të kërkojë zyrtarisht që prokuroria të hapë hetimet për fondet sekrete greke për të cilën ne po bëjmë gati denoncimin tonë.”
