Juventusi është duke përgatitur një plan që të bëjë një goditje të madhe në merkaton e verës dhe nën shënjestër është kapiteni i Interit, Mauro Icardi. Një shkëmbim që në pamje të parë duket i pamundur, pasi në operacion do të përfshihet kartoni i Gonzalo Higuain. Ky është një plan që bardhezinjtë e praktikojnë prej vitesh, ku gjithmonë përpiqen të dobësojnë ekipet rivale duke u hequr më të mirët.
Pas Higuain dhe Pjanic të cilët i mori nga Napoli e Roma, bardhezinjtë tashmë kërkojnë të “zhvatin” Interin, pasi duke iu referuar asaj që shkruan gazeta italiane Corriere della Sera, drejtori i përgjithshëm i kampionëve të Italisë Beppe Marotta ka vendosur në shënjestër kapitenin e zikaltërve Mauro Icardi.
Kryegolashënuesi i Serisë A në sezonin e fundit(çmim që Icardi e ndau me Immobilen), pëlqehet shumë nga drejtuesit e Juventusit të cilët po shqyrtojnë mundësinë për të blerë kartonin e Mauritos nga Interi. Icardi ende nuk ka rinovuar kontratën e tij me klubin milanez dhe duke marrë në konsideratë edhe deklaratat e fundit të trajnerit Spalletti, shanset që argjentinasi të largohet nga Interi në këtë merkato janë të mëdha.
Nga 1 korriku deri në datën 20 të këtij muaji për Icardin hyn në fuqi klauzola e largimit prej 110 milionë eurosh e cila gjithsesi vlen vetëm për klubet jashtë Italisë. Drejtuesit e Juves i kanë kërkuar një studioje ligjore të analizojë klauzolën e sulmuesit argjentinas me Interin ndërkohë që sipas Corriere della Serras, zikaltrit janë të gatshëm të dëgjojnë ofertën e klubit bardhezi.
Juventusi 110 milionë euro për Icardin nuk është i gatshëm ti ofrojë gjithsesi pasi kërkon të përfshijë në marrëveshje kartonin e Gonzalo Higuain. Juventusi mendon për të tashmen por edhe për të ardhmen dhe për çështje moshe bardhezinjtë janë gati ta largojnë El Pipitan i cili në dhjetor mbush 31 vjeç dhe t’i hapin dyert kapitenit të Interit i cili është 5 vite më i ri se bashkëkombësi i tij.
50 milionë euro plus kartonin e Higuain mund të jetë oferta e Juves për zikaltrit, pasi bardhezinjtë e vlerësojnë 60 milionë euro kartonin e Higuain të cilin e blenë nga Napoli 2 vite më parë për diçka më shumë se 90 milionë euro. Ofertë që gjithsesi vështirë se do të pranohet nga Piero Ausilio.
