Çështja e ekstremistit grek i cili u vra më 28 tetor në Bularat, është rikthyer sërish në fokus nga mediat greke. Shtypi grek ka zbuluar detaje të reja, që solli reagimin e 35-vjeçarit minoritar në Bularat. Sipas tyre, Kacifas është provokuar nga policia shqiptare. Madje ato shkojnë më tej teksa shkruajnë se 35-vjeçari, për disa ditë me radhë është provokuar nga inspektori i zonës në Bularat.
Po i njëjti burim raporton se i ndjeri është provokuar për ditë të tëra, ndërsa ditën që ndodhi ngjarja, 35-vjeçarit i është vënë edhe arma në kokë. Sipas tyre, arma që kishte Kacifasi në dorë ishte e policit që e ngacmonte, dhe që ekstremisti grek ia kishte rrëmbyer nga dora.
Mediat fqinje shkruajnë po ashtu se ditën e ngjarjes, Konstantinos Kacifas është provokuar në lokalin e fshatit, gjë që solli më pas dhe reagimin e tij.
Minoritarët grekë e shpallën Kacifasin hero. Mijëra vetë iu bashkuan përcjelljes së fundit të ekstremistit grek, duke e shndërruar atë në një manifestim urrejtje dhe përçarje antishqiptare.
Duke dashur të ulë tonet, më herët kryeministri grek Alexis Tsipras u shpreh në televizionin Alpha, se Greqia bëri atë që duhet të bënte në rastin e ngjarjes në Bularat.
