Ashtu si premtoi Spalletti, Interi bëri kthesën e madhe përballë Tottenham dhe pritet që me të njëjtin entuziazëm të vazhdojnë edhe në ndeshjet e kampionatit. Zikaltërit faktikisht nuk e kanë nisur aspak mirë sezonin në Serie A dhe për këtë deri para ndeshjes në Champions League janë kritikuar shumë.
Duket se ajo përmbysje ka ndezur emocionet edhe tek “i përjashtuari” i Interit, Joao Mario. Gjatë periudhës që ishte në huazim portugezi bëri disa deklarata të nxituara dhe paraqitja e tij në fushë nuk ka qenë aspak e mirë, por duket se tani ai e sheh të ardhmen ndryshe.
Së fundmi portugezi ka dhënë edhe një intervistë për “Sky Sport” teksa thotë: “Mendimi im është që duhet të bëj të pamundurën që t’i kthej vërshëllimat në duartrokitje. Është gjithmonë e vështirë dhe e sikletshme për tifozët vërshëllejnë, por tani e kuptoj përse ndodh kjo dhe dua të ndryshoj situatën.
Mendoj se ka të bëj me problemi e gjuhës së trupit. Ndonjëherë duket sikur nuk i jap rëndësi lojës, por duhet të përmirësohem sepse kam shumë vullnet për të bërë një punë të mirë. Duhet të japim gjithmonë maksimumin, sepse nuk ka asnjë justifikim kur nuk fitojmë. Me modulin që Spalletti po përdor tani ndihem më mirë si mesfushor qendre”.
