Blutë e Tiranës kanë zbuluar detaje të reja në lidhje me atentatin e një dite më parë në Laprakë të 17-vjeçares Griselda Gjikola. Nga të shtënat me armë zjarri mbeti i plagosur edhe i dashuri i saj, Erjon Bengo, 23-vjeç nga Paskuqani, ndërsa ndodheshin në makinën e këtij të fundit.
Ngjarja ka ndodhur pas konfliktit të ndodhur një javë më parë, mes autorit të identifikuar, i cili është 19-vjeç, me origjinë nga Puka dhe 23-vjeçarit, pasi ky i fundit e kishte qëlluar për shkak se 19-vjeçari i kishte ngacmuar të dashurën (viktimën).
Po ashtu, policia ka ushtruar kontroll edhe në banesën e 19-vjeçarit të identifikuar si autori i dyshuar i vrasjes, por nuk e ka gjetur. Policia dhe Prokuroria po hetojnë paralelisht edhe në pista të tjera, përfshirë edhe të shkuarën e dy të rinjve.
17-vjeçarja Griselda Gjikola u qëllua me një plumb në kokë, e ndërsa Benga u plagos me dy plumba, në shpatull dhe qafë. Dyshohet se gjithsej janë qëlluar katër plumba.
Pavarësisht plagëve, 23-vjeçari Benga e ka marrë 17-vjeçaren dhe e ka çuar në spitalin e Traumës, që ndodhet pak kilometra larg vendit të ngjarjes. Me të mbërritur në spital, ajo ka ndërruar jetë.
