Dhurimi i djalit tek vëllai është bërë shkak që një 30-vjeçar mos ta mendonte dy herë, po ti digjte me benzinë shtëpinë vjehrrit. I moshuari i ka kërkuar llogari pse ai po i dhuronte djalin e porsalindur, por 30-vjeçari i ka thënë se i vëllai nuk mundet të ketë shtëpinë me fëmijë, ndaj ai po e bën këtë akt me vullnet të lirë.
Kaq është dashur që situata mes palëve të tensionohej, dhe më pas të përfundonte me një shtëpi të shkrumbuar. Por tashmë blutë e Elbasanit kanë vënë në pranga autorin, i cili i dogji shtëpinë vjehrrit.
Kjo ngjarje ka ndodhur katër ditë më parë, por vetëm në fundjavë u zbulua se kishte qenë lindja e djalit të tij, shkaku që u bë sherr me vjehrrin. Burime të policisë bënë të ditur se 30- vjeçari Ç. Kasa, nga fshati Reçan, shumë afër Elbasanit, dogji shtëpinë e prindërve të bashkëshortes së tij në mënyrë të qëllimtë, pas një debati që kishte nisur menjëherë pas lindjes së djalit të 30-vjeçarit.
30-vjeçari ishte i martuar dhe kishte një vajzë rreth 4-vjeçe dhe djalin e sapolindur. Vëllai i tij, për arsye natyrale, nuk shtohej dot me fëmijë dhe për këtë arsye, Kasa i kishte premtuar se do t’ia jepte atij fëmijën e dytë që do të lindte.
Që në maternitet, 30- vjeçari ia dhuroi vëllait të tij, duke hequr dorë nga atësia. Burime nga fshati bëjnë të ditur se Kasa ka shkuar në banesën e vjehrrit të tij për të pirë një kafe, por ky i fundit e ka pritur keq dhurimin e nipit të tij, aq më tepër pa iu marrë miratimi, shkruan “Panorama”.
“Mos ia jepje djalin vëllait, por bëje një fëmijë të tretë, pasi djali ishte trashëgimtari i shtëpisë tënde”. Kjo ka qenë zanafilla e bisedës, e ku më pas ka përfunduar me debat nga ana ana e 30-vjeçarit.
“Bëj fëmijë tjetër, nuk kam bërë mëkat që mbusha shtëpinë e vëllait tim”, i është drejtuar dhëndri. Por debati me fjalë është acaruar, pasi vjehrri e ka akuzuar atë se kishte vendosur kundër vullnetit të së bijës. E gjithë këmbëngulja e 63-vjeçarit M.S., për fëmijën ishte edhe për faktin se ai nuk kishte pasur djalë vetë, dhe lindja e një nipi kishte qenë një gëzim i madh për të dhe të shoqen. Ai është befasuar kur ka mësuar se nipi i sapolindur do të rritej me prindër të tjerë, dhe jo nga e bija dhe dhëndri i tij.
